පිළිකාවට එකතු කළ මුදල් සොරකම් කළ පුද්ගලයා පොලිසියට මාට්ටු – දැරියකගේ ගිණුමකින් ලක්ෂ 03ක් අරගෙන.

පිළිකා රෝගයට ප්‍රතිකාර ලබා ගැනීමට ආධාර පිණිස මුදල් රැස්කරන බැංකු ගිණුම්වලින් අන්තර්ජාලය ඔස්සේ මුදල් සොරාගන්නා ජාවාරමක් වැටලීමට කොළඹ අපරාධ කොට්ඨාසය සමත්ව තිබෙනවා.

හොරණ ප්‍රධාන පෙළේ පාසලක 9වැනි ශ්‍රේණියේ ඉගෙනුම ලබන දැරියකගේ බැංකු ගිණුමක් මගින් වංචනික ලෙස මෙම මුදල් ලබාගත් 25 හැවිරිදි පුද්ගලයෙකු අත්අඩංගුවට ගෙන ඇති අතර සිද්ධිය සම්බන්ධයෙන් තවත් සැකකරුවන් කිහිප දෙනෙකු අත්අඩංගුවට ගැනීමට නියමිත බවද කොළඹ අපරාධ කොට්ඨාසයේ නිළධාරීන් සදහන් කළා.

මොළයේ වම්පස කොටසේ හටගත් දරුණු පිළිකාවක් නිසා පීඩා විඳිමින් සිටින මෙම දැරිය කහතුඩුව ප්‍රදේශයේ කුලී නිවසක පදිංචි පවුලක එකම දරුවාද වනවා.

ඇයට සරණක්වීම සඳහා මුදල් රැස්කිරීමට ඇයගේ පාසලේ ගුරුවරුන් හා ආදි සිසුන් ඇතුළු පිරිසක් ෆේස්බුක් සටහන් යොදා තිබුණ අතර ඒ සඳහා පරිත්‍යාගශීලින් වරින්වර මුදල් බැරකර තිබුණේ දැරියගේ පියාට අයත් බැංකු ගිණුමකටය.

ඒ අනුව පසුගිය ජුනි (9 ) වැනිදා නාදුනන පුද්ගලයෙක් විසින් දැරියගේ පියාට ඇමතුමක් ලබා දී මුදල් පරිත්‍යාග කිරීමට කැමැති බව පවසා තිබෙනවා.

“රුපියල් 20,000ක් දානවා කියලා හැඳුනුම්පත් අංකය ඉල්ලුවා. ඊට පස්සේ මට බැංකුවෙන් පණිවුඩයක් ආවා රහස් අංකය දෙන්න එපා කියලා. ඒ නිසා මම ඒක දුන්නේ නෑ. ඊට විනාඩි 10කට විතර පස්සේ එයා ආපහු කෝල් එකක් අරගෙන මගෙන් ඇහුවා ගණුමට සල්ලි වැටුණ ද කියලා. මම කිව්වා නෑ කියලා. මට බැංකුවෙන් පණිවුඩයක් ආවා මගේ ගිණුමෙන් ශත 56ක් අඩු වුණා කියලා. මම ඒක එයාට කිව්වා. ආ හරි කියලා විනාඩියක් ගියේ නෑ රුපියල් 20,000ක් අඩු වුණා. ඊට පස්සේ 25,000ක්. එහෙම දිගටම මැසේජ් එන්න ගත්තා. 300,180ක් අඩු වුණා. ඒ පාර මම පොලීසියට ගිහින් පැමිණිල්ලක් දැම්මා.”

මෙලෙස ගිණුමේ තිබූ රුපියල් ලක්ෂ 3ක මුදලක් අවස්ථා 9කදී සොරා ගැනීම පිළිබඳ දැරියගේ පියා විසින් කොළඹ අපරාධ කොට්ඨාසයට ජූනි (11) වැනිදා පැමිණිල්ලක් ඉදිරිපත් කර තිබෙනවා.

ඒ අනුව කොළඹ අපරාධ කොට්ඨාසය මගින් සිදුකළ විමර්ශනවලදී අනාවරණ වී ඇත්තේ එරාවුර් පොලිස් වසමේ පදිංචිකරුවෙකු මෙම ගිණුමෙන් මුදල් සොරාගෙන ඇති බවයි.

සිද්ධිය සම්බන්ධ සැකකරු අයියන්කේනි ප්‍රදේශයේදී (11) අත්අඩංගුවට ගැනුණ අතර සැකකරු හෙළිකර ඇත්තේ රෝගීන් සඳහා ආධාර රැස්කරන මෙවැනි ගිණුම් රැසකින් අවස්ථා කිහිපයකදී තමන් මුදල් ලබාගත් බවයි.

ඒ සඳහා යොදාගත් සිම්පත් 17ක්, ජංගම දුරකථන 3ක් මෙන්ම පරිහරණය නොකළ සිම්පත් 7ක්ද පොලිස් භාරයට ගෙන ඇත.

එමෙන්ම පොලිස් වැඩිදුර විමර්ශන මගින් අනාවරණ වී ඇත්තේ මොහු සිංගප්පූරුවේදී පරිගණක පාඨමාලාවක් හදාරා ඇති අයෙකු බවයි.