බතක් ඉදිලා තාත්තගේ මළගමට පස්සේ හාල් මිටකට අම්මෙ උඹ මොනවාද වික්කේ – කසුන් ඕපාත

‘හාල් ඇටයක් ගෙදර නෑ සති දෙකක් තිස්සේ

අපේ ඇස්වල කඳුළු නෑ නෑදෑයෝ දැක්කේ

බතක් ඉදිලා තාත්තගෙ මළගමට පස්සේ

හාල් මිටකට අම්මෙ උඹ මොනවාද වික්කේ…//

 

නංගිගේ කිරි සිනා ඇයි දැන් අඩුවෙලා

හාමතේ ඇති අනේ පව් බඩගිනි වෙලා

උඹේ පපුවත් රිදෙනවා ඇති පිච්චිලා

නාඩා ඉඳපන් අම්මෙ ඩිංගක් ඉවසලා…//

 

මල්ලිගේ ඉස්කෝලෙ වැඩ අතපසු වෙලා

පොතක් පෑනක් නැතිව ඌ අඩපණ වෙලා

කාසි දෙක තුන හොයන් එන්නම් ලොකු වෙලා

නාඩා ඉඳපන් අම්මෙ ඩිංගක් ඉවසලා…//

 

හාල් ඇටයක් ගෙදර නෑ සති දෙකක් තිස්සේ

අපේ ඇස්වල කඳුළු නෑ නෑදෑයෝ දැක්කේ

බතක් ඉදිලා තාත්තගෙ මළගමට පස්සේ

හාල් මිටකට අම්මෙ උඹ මොනවාද වික්කේ…//’

 

දරදඬු හදවතක් වුණත් පසාරු කරගෙන යන තරමේ වචන ටිකක්. එහේ මෙහේ දිවයන හිත් එකතැනක නතර කරන සංගීතයක්. ඇස් අගට කඳුළු උනන ගායනයක්. සමාජ මාධ්‍යයේ මේ දිනවල ජනප්‍රියම ගීතය ඒක. ගීතය ගායනා කරන්නේ කසුන් ඕපාත කියලා පාදයක් අහිමිව ගිය තරුණයෙක්. දරාගත නොහැකි අහිමිවීම් හමුවේ ජීවිතය අත්හැර යන මිනිසුන් අතර අපි කියන කසුන් ඕපාත අහිමිවීම් ගණනාවක් මැද ජීවිතය දිනූ තරුණයෙක් කිව්වොත් හරි. එනිසා අද ඔහුව නොදන්න පිරිසට වඩා දන්න පිරිසයි වැඩි. හාල් මිටකට, කලදසාව වැනි ගීත හරහා ජනප්‍රිය ගායන ශිල්පියෙක් ලෙස බොහෝදෙනා ආදරය කරන ඔහු පළවැනි වතාවට තම ජීවිත කතාව ‘ධරණී’ සමඟින් බෙදාගන්න එකතුවුණේ මේ විදියට.

 

*මුලින්ම අපි ආසයි ඔබෙන්ම කසුන් ඕපාත ගැන දැනගන්න?

කසුන් ඕපාත කියන්නේ සංගීතයට ආදරේ කරන සංගීතය තමන්ගේ ජීවිතේ අංක එක කරගත්තු උත්සාහවන්ත, මහපොළොවේ ජීවත්වෙන සරල මනුස්සයෙක්.

 

*එක්වරම මේ කසුන් මතුවුණේ කොහොමද?

මගේ ‘කලදසාව’ කියන ගීතය පසුගිය දිනවල සමාජමාධ්‍යයේ සෑහෙන්න ප්‍රසිද්ධ වුණා. ඒ නිසා ගොඩාක් අය කවුද මේ කසුන් ඕපාත කියන්නේ කියලා හොයන්න ගත්තා. ඒ හොයද්දි මං දැනට අවුරුදු දෙකකට කලින් කරපු ‘හාල් මිටකට’ ගීතයත් ඔවුන්ට අහන්න දකින්න ලැබුණා. ඒකත් ඔවුන් ආදරෙන් වැළඳගත්තා. ඒත් එක්ක විවිධ රූපවාහිනී, යූටියුබ් වැඩසටහන්වලට මට කතා කළා. එහෙම තමයි කසුන් ඕපාතව එකපාර මතුවුණේ.

 

*පුංචි කාලේ ඉඳන් හීන දැක්කේ ගායකයෙක් වෙන්නද?

ඒ කාලේ අපේ අක්කා ළඟ පුංචි මෙලෝඩිකාවක් තිබුණා. එයා ඒක හරි ලස්සනට වාදනය කළා. මං කිව්වා මටත් පුරුදු කරන්න කියලා. ඉතින් මටත් පුරුදු කළා. එතැනදි තමයි සංගීතය ගැන ආසාව ඇතිවුණේ. ඒ කාලේ මං හිතුවා දවසක ලංකාවම දන්න ගායකයෙක් හරි වාදකයෙක් හරි වෙනවා කියලා.

 

*ඒ හීනයට යන්න පුළුවන් වටපිටාවක් ඔබේ පවුලේ තිබුණද?

ඒ කාලේ අපි හිටියේ බෙන්තර ඉඳුරුවේ. දැන් අපි ඉන්නේ නවදගල. පවුලේ හිටියේ අම්මා, තාත්තා ඇරුනම අක්කලාම දෙන්නෙක්. තාත්තා මේසන් වැඩ කළේ. අපි හරි දුප්පත්. කටුමැටි ගහපු පොඩි ගෙදරක හිටියේ. ආර්ථික ප්‍රශ්න දවසින් දවසට වැඩිවෙද්දි තාත්තා රට ගියා. ඉතින් ඇත්තටම මං දැකපු හීනයට යන්න තරම් වටපිටාවක් පවුලේ තිබුණේ නෑ. අවාසනාවට මං ගිය ගමේ පාසලෙත් සංගීතය කියලා විෂයක් තිබුණේ නෑ. ඒ හීනයට තටු ලැබුණේ ශිෂ්‍යත්ව විභාගය සමත්වෙලා මට අම්බලන්ගොඩ ධර්මාශෝක විද්‍යාලයට යන්න ලැබුණට පස්සේ. ඒ පාසලේ සංගීත විෂය තිබුණා.

 

*එතකොට කසුන් කකුලට මොකද වුණේ?

මං පාසල් ගියේ ආවේ කෝච්චියේ. එක දවසක් කෝච්චියේ එද්දි කෝච්චියෙන් වැටුණා. වැටිලා කකුල කෝච්චියටම අහුවෙලා ඉහළින්ම වෙන්වෙලා ගියා. එතකොට මං හිටියේ 9 පන්තියේ. ඒ එක්ක මාස තුනකට එහා කරාපිටිය රෝහලේ නේවාසිකව හිටියා. ගෙදර ඇවිල්ලත් ඒ කකුලට මාස ගාණක් බෙහෙත් කළා.

 

*ඒ එක්ක පාසල් ගමන නැවතෙන්න ඇති?

මං 10 වසරේ ඉඳන් පාසල් යන්න ගත්තා. උසස් පෙළ විභාගයත් කළා. ඒ වෙනකල් මං විෂයක් විදියට සංගීතය ඉගෙනගත්‍තා. කීබෝඩ් එකත් පුරුදු වුණා.

 

*ඒත් එතැන ඉඳන් ජීවිතේ ගෙවන්න පහසු නොවෙන්න ඇති නේද?

ඔව් ජීවත්වෙන්න නොකරපු දෙයක් නෑ. අවුරුදු 14 ඉඳන් බෑන්ඩ් ගැහුවා. කීබෝඩ් එක වාදනය කළේ. කමියුනිකේෂන් එකක වැඩ කළා. ගාමන්ට් එකක ඇඳුම්වල නූල් කැපුවා. පාර අයිනේ තැඹිලි විකුණුවා. කඩවලට සීඩී දැම්මා. ඔය වගේ එක එක රැකියා කළා. මොකද ජීවත්වෙන්න විදියක් තිබුණේ නෑ. තාත්තාත් රට හිටියට සල්ලි එව්වේ නෑ.

 

*සමහරු ඔබට අපහාස කළේ එහෙම නැද්ද?

මොකද නැත්තේ කළා. මගේ කන් දෙකට ඇහිලා තියෙනවා මට අබ්බගාතයා, නොන්ඩියා, කොරා කියනවා. ඒත් මම ඔවුන්ට වෛර කරන්න ගියේ නෑ. එහෙම කියන වාරයක් පාසා හිතාගත්තා මං කවුද කියන එක දවසක පෙන්නනවා කියලා. අද ඒ අයට පෙන්නලා තියෙනවා මම කවුද කියලා.

 

*ඔබ කවුද කියලා ගොඩාක් අය දැනගත්තේ ‘හාල් මිටකට’ ගීතයෙන්?

ඔව් ඒ ගීතය පද රචනය, තනුව මගේ. සංගීතය ශකිල දිල්ශාන්. ඒ ගීතය මගේ ජීවිතේට හුඟාක් සමීප එකක්. මුල් පද දෙකේ තියෙන්නේ මගේ ජීවිත කතාව. ඒ එක්ක තමයි මගේ අතින් මේ සිංදුව ලියැවුණේ. මොකද මගේ ජීවිතේ එක්තරා කාලයක් තිබුණා බත් කටක්වත් කන්න නැතුව බඩගින්නේ හිටපු. ඒ තාත්තා රට ගිහින් සල්ලි එවපු නැති කාලේ. කීයක් හරි හොයාගෙන පාන් කෑල්ලක් කාලා තමයි ජීවත්වුණේ. මට මතකයි පොල් කඩලා විකුණලා අම්මට සල්ලි ගෙනැත් දෙනවා. නෑදැයෝ බැලුවෙත් නෑ. අපේ අම්මා නෑදෑ ගෙවල්වල යනවා කන්න දෙයක් ඉල්ලගන්න. ඒ වුණාට ලැබෙන්නේ නෑ. එක දවසක් අම්මට පරණ ත්‍රිපෝෂ උරේකට වේලපු හාල් පොඩ්ඩක් ලැබිලා ඒක අපි දවස් කීපයක් කෑවා. ඒකත් හාල් මිටකට ගීතයේ තියෙනවා.

 

*පසුගියදා එළිදක්වපු ‘කලදසාව’ ගීතයත් සෑහෙන්න ජනප්‍රිය වුණා?

ඔව් මං හිතන්නේ ඒක මගේ සංගීත ජීවිතයේ එක්තරා හැරවුම් ලක්ෂයක්. මං කවුද නොදැන හිටපු ලොකු පිරිසක් ඒ ගීතයෙන් පස්සේ මාව දැනගත්තා. ඒකත් මගේ ජීවිත කතාවට සමීප ගීතයක් කිව්වොත් හරි. ‘කලදසාව’ පද රචනය කළේ පැතුම් සම්පත් අංගම්පොඩි. තනුව සහ සංගීතය දෙකම මගේ. ඒක අහපු ගොඩාක් අය මට කියනවා ඒක ජීවිතේට අභිප්‍රේරණයක් වුණා කියලා. ඒ ගීතයේ මම ආසම කොටස තමයි මේ.

 

‘හිතන දේවල් හිතන විදිහට

නොවෙන එක දිවියේ සොබාව…

අඳුරු මතකය වසා දමනවා

කාලයාගේ වැලිතලාව…

හිතට හුරු කරවා හිනාවෙන්

රිදෙන වග සඟවන කලාව…

තමන්ටම මිස ග්‍රහයෙකුට බෑ

හොඳ කරන්නට කලදසාව…’

 

*ඔබ පවතින රැල්ලෙන් පිට පැනලයි ඔබේ නිර්මාණ කරන්නේ. ඊට හේතුවක් තියෙනවාද?

මම ආස නෑ දැන් තියෙන ගීත රැල්ලට. මම ආස හදවතට දැනෙන්න ගයන්න. සරලවම කීවොත් මං ආස නිවීසැනසිල්ලේ සිංදු අහන මිනිස්සුන්ට සිංදු කියන්න.

 

*කසුන් දැන් ජනප්‍රියයි. ප්‍රවීණ ගායන ශිල්පීන් ශිල්පිනියන් එහෙම කතා කළේ නැද්ද?

චාමර රණවක කතා කළා. එයා හරි නිහතමානී ගායකයෙක්. මං බලන්න අපේ ගෙදරත් ආවා. ඒ ආවම ඔහු කිව්වා ලයිව් සිංදුව අහන්න ආසයි ඒ නිසා කියලා පෙන්නන්න කියලා. ඊට අමතරව ටීවී ප්‍රෝගෑම්වලට ගියාම එහෙම ඒකට ඇවිත් හිටපු කලාකරුවෝ මගේ සිංදු අහලා සෑහෙන්න මාව අගය කළා.

 

*ගායකයෙක් විදියට කසුන්ට හීනයක් ඇති?

මං හරි ආසයි ගුණදාස කපුගේ මහත්තයා වගේ හදවතට දැනෙන ගීත ටිකක් අපේ රටේ මිනිස්සු වෙනුවෙන් දීලා මැරිලා යන්න.

 

*කසුන්ට දැන් වයස කීයක් වෙනවද?

(සිනාසෙමින්) දැන් නම් මට 40ක් වගේ වෙනවා.

 

*එහෙනම් දැන් විවාහ වෙලා එහෙමත් ඇති?

ඔව් විවාහ වුණා. අපිට දුවෙකුත් ලැබුණා. ඒ අතරේ බිරිඳ බෙහෙතක් විෂවෙලා නැතිවුණා. දුවට දැන් 16ක්. ඊටපස්සේ මං ආයෙත් විවාහ වුණා. ඇය මං එක්ක අවුරුදු 9ක් ඉඳලා 2021 අවුරුද්දේ දාලා ගියා. ඒ වෙද්දි ඇයගෙනුත් මට පුතෙක් හිටියා. ඒ පුතාට දැන් අවුරුදු 10ක්. මං දැන් දරුවෝ එක්ක තනියම ජීවත්වෙනවා.

 

*දෙවෙනි බිරිඳත් ඒ විදියට අහිමිවෙලා යද්දි ඒ වේදනාව දරාගත්තේ කොහොමද?

ඇත්තටම දරාගන්න බැරිවුණා. මං දවස් ගණන් ඇඬුවා. බිම පෙරළි පෙරළි ඇඬුවා. ජීවිතේ නැති කරගන්න පවා හිතුවා. ආයෙත් හිතුණා දාලා ගිය කෙනෙක් වෙනුවෙන් ජීවිතේ නැතිකරගන්නේ මොකටද කියලා. ඒත් හිතේ දුකක් තිබුණා. ඔය අතරේ මං ඕඩියෝ ඉංජිනියර් කෝස් එකක් කරමින් හිටියේ. ඒකෙ සර් මම ෆේස්බුක් දාපු පෝස්ට් එකක් දැකලා මට කතා කරලා ඇයි කසුන් ප්‍රශ්නයක්ද ඇහුවා. මං සේරම කිව්වා. ඊටපස්සේ සර් කිව්වා වයිෆ් ඕනේ නම් දවස් 21ක් යනකල් මස් මාළු නොකා උදේට හවසට පහන තියන්න, භාවනා කරන්න කියලා. වයිෆ්ට තිබුණු ආදරේට මං දවස් 21ක් එහෙම කළා. ඒත් වයිෆ් ආවේ නෑ. පස්සේ මං සර්ට කතා කළා. සර් ඇහුවා දැන් ඔයාට වයිෆ් ඕනෙද කියලා. මං කිව්වා දැන් ඕන නෑ කියලා. ඇත්තටම ඒ වෙනකොටත් මගේ හිත හැදිලා තිබුණා.

 

*කසුන්ගේ හිතේ ඇය ගැන දැන් වෛරයක් තරහක් එහෙම තියෙනවද?

අනේ නෑ. කිසිම වෛරයක් තරහක් නෑ. අදටත් මම පහන තියද්දි එයාව මතක් කරලා ඉන්න තැනක හොඳින් ඉන්න කියලා ප්‍රාර්ථනා කරනවා.

 

*බිරිඳ ඉන්න කාලේ ඇයට ඔබ කතා කළේ මොකක් කියලද?

මම කතා කළේ ‘මැණිකේ’ කියලා. එයා ගියාට පස්සේ මං එයාට ගීතයකුත් ලිව්වා.

 

*මං ආසයි ඒ ගීතයේ පුංචි කොටසකින් අපේ කතාබහ අවසන් කරන්න?

‘ඒ හීන හරිම සොඳුරු නේද

ඉටුනොවුණත් මැණිකේ…

නුඹ ඉන්න තැනක හොඳින් නේද

මට ඒ ඇති මැණිකේ…’

 

රුවන් එස්.සෙනවිරත්න