අපිට අලුත් අවුරුදු සුබයි. ඔයාලටත් සුබ වේවා..! හිමේන් මේලක ජයසේකර අංජලී ජයසිංහ

මේ දිනවල පුංචිතිරයේ විකාශනය වෙන ටෙලිනාට්‍ය අතරින් ඉතාම ජනප්‍රිය
ටෙලිනාට්‍යයක් තමයි දෙරණ නාලිකාවේ විකාශනය වෙන ‘සිකුරු ඇවිත්’ කියන
ටෙලිනාට්‍යය. සදෙව්ගෙත් අංජලීගෙත් ආදර කතාවත් එක්ක ගලාගෙන යන ඒ
ටෙලිනාට්‍යයට ප්‍රේක්ෂකයින්ගෙන් සෑහෙන ආකර්ෂණයක් ලැබිලා තියෙනවා. ඒකට
හේතුව එහි සදෙව්ටත් අංජලීටත් රංගනයෙන් දායකවෙන නළු නිළි දෙපල. ඔවුන්
රංගනයට නවකයෝ වුණත් ප්‍රේක්ෂක හදවත් ඔවුන් කෙරෙහි ඇද බැඳ
තබාගන්න ඔවුන් සමත්වෙලා අවසන්. ඉතින් 2025 අලුත් අවුරුද්දට ආවඩා
ආයුබෝ කියලා අලුත් අවුරුද්දේ පළවැනිම ‘ධරණී’ කවරයට අපි ආරාධනා කළේ
ඔබ ආදරය කරන ඒ දෙදෙනාට. ඒ සදෙව් ලෙස ඔබේ ආදරය දිනාගත්ත හිමේන්
මේලක ජයසේකරට සහ අංජලී ලෙස ඔබේ ආදරය දිනාගත් අංජලී ජයසිංහට.
“පුංචි කාලේ ඉඳන් මගේ හීනයක් වුණේ කවදා හරි රංගන ක්ෂේත්‍රයෙන්
වගේම ගායන ක්ෂේත්‍රයෙන් තැනකට එන්න. ඒ හීන දෙකම අද වෙනකොට මං
සැබෑවක් කරගෙන තියෙනවා.”

අපිත් එක්ක ඒ විදියට මුලින්ම කතාබහට මුලපිරුවේ හිමේන්. හිමේන් පුංචි
කාලේ ඉඳන්ම නළුවෙක් වෙන්න හීන දැක්කත් ඒ හීනය සැබෑවුණේ හරිම
අහම්බයෙන් කියලයි ඔහු අපිට කිව්වේ.
“මට එක්තරා රූපවාහිනී නාලිකාවක වැඩසටහනකට සහභාගි වෙන්න එක
සැරයක් අවස්ථාවක් ලැබුණා. ඒ ගියාම වැඩසටහන කරපු නිවේදන ශිල්පියා
මගෙන් විනෝදාංශයන් ගැන ඇහුවා. ඒ වෙලාවේ මං කිව්වා රඟපාන්න, සිංදු
කියන්න එහෙම කැමතියි කියලා. එදා ඒ කියන එක දැකලා තිබුණා
ටෙලිනාට්‍ය අධ්‍යක්ෂක ඩිල්ෂාන් අමරසිංහ අයියා. ඒ දැකලා මට ඔහුගේ අලුත්
ටෙලිනාට්‍යයට කතා කළා. ඒ ටෙලිනාට්‍යය තමයි 2021 කාලේ වගේ හිරු
නාලිකාවේ විකාශනය වුණු ‘ළංවී’ කියන ටෙලිනාට්‍යය.”
ඒත් එක්ක හිමේන්ට පුංචිතිරයේ ටෙලි නිර්මාණවලට දිගටම ආරාධනා එන්න
ගත්තලු. ඒත් තෝරා බේරාගෙන ඒ ආරාධනා බාරගත්ත හිමේන්ගේ රංගන
ජීවිතේ වෙනස්වෙලා තියෙන්නේ දෙරණ නාලිකාවේ ‘සිකුරු ඇවිත්’ ටෙලිනාට්‍යය
තුළින්. මොකද ඒ ටෙලිනාට්‍යයේ ‘සදෙව්’ කියන ප්‍රධාන චරිතයටයි හිමේන්ට කතා
කරලා තියෙන්නේ.
“සදෙව්ගේ චරිතයට ප්‍රේක්ෂක ප්‍රතිචාර හොඳින්ම ලැබෙනවා. ඒ ටෙලිනාට්‍යය
නරඹන ප්‍රේක්ෂකයෝ ඒ චරිතෙට හරිම ආදරෙයි. මේ වෙලාවේ එහි අධ්‍යක්ෂ
තිළිණ බොරලැස්ස, තිර රචනය කරන බුද්ධික සේමසිංහ සහ නිෂ්පාදන කරන
ජානක සිරිවර්ධන කියන අය ආදරෙන් මතක් කරන්න ඕන.”
සිකුරු ඇවිත් ටෙලිනාට්‍යයේ සදෙව් සහ අංජලීගේ ආදර කතාව ගැනත් අපි
හිමේන්ගෙන් අහලා බැලුවේ ටෙලිනාට්‍ය නරඹන කවුරු වුණත් එහි අවසානයක්
ගැන පුංචි ඉඟියක් හරි දැනගන්න ආස ඇති කියලා හිතුණු නිසාමයි.
“(සිනාසෙමින්) ඒ ආදර කතාව ගැන මම කිව්වොත් මෙච්චර දවසක්
ටෙලිනාට්‍යය නරඹපු ප්‍රේක්ෂකයින්ගේ රසවින්දනයට ඒක හානියක් වෙන්න
පුළුවන්. ඒක නිසා දිගටම නරඹන්න කියලා විතරක් දැනට මං කියන්නම්.
හැබැයි ඉදිරියේදි කවුරුත් නොහිතපු දේවල් සිදුවෙයි.”
හිමේන් තාමත් රංගන ක්ෂේත්‍රයට නවකයෙක් නිසා ඔහුට තියෙන ලොකුම
අභියෝගයක් තමයි නළුවෙක් විදියට රංගන ක්ෂේත්‍රයේ පැවැත්මක් හදාගන්න
එක. ඒ ගැන හිමේන්ගෙන් ඇහුවම ඔහු දුන්නු උත්තරේ තමයි මේ.

“මං කොහොමත් අභියෝග බාරගන්න ලෑස්තියි. මට මතකයි මං පාසල් කාලේ
සෑහෙන්න මහත ළමයෙක්. ඒත් එක්ක ගොඩාක් ප්‍රශ්නවලට මුහුණදුන්නා. ඒත්
මට පුළුවන් වුණා ඒ පෙනුම කොහොම හරි වෙනස් කරගන්න. රංගන
ශිල්පියෙක් විදියට පැවැත්ම හදාගන්න එකත් ලොකු අභියෝගයක් තමයි. ඒත්
මං හිතනවා අපිට ලැබෙන නිර්මාණ වෙනුවෙන් අපි උපරිම සාධාරණයක්
කළොත් පැවැත්ම ගැන බයවෙන්න උවමනා නැහැ කියලා.”
හිමේන් රංගන ශිල්පියෙක් විදියට විතරක් නෙවෙයි ගායන ශිල්පියෙක් විදියටත්
සෑහෙන ප්‍රසිද්ධයි. ඒ නිසාමයි ඒ ගැනත් හිමේන්ගෙන් අහලා බැලුවේ.
“ගායකයෙක් විදියටත් මේ වෙනකොට යම්කිසි තැනකට ඇවිත් තියෙනවා.
ගීත කිහිපයක්ම කළා. අලුත් ගීතය ‘සොඳුරු සිහිනයක’ කියලා දැනට ටික
දවසකට උඩදි එළිදැක්වුවා. ඒකට හොඳ ප්‍රතිචාර තියෙනවා. මගේ ලොකු
ආසාවක් තමයි සංගීතය පැත්තෙන් ජාත්‍යන්තර මට්ටම දක්වා යන්න. මේ
වෙද්දිත් ජාත්‍යන්තර මට්ටමේ චරිත එක්ක මං වැඩ කරනවා.”
තාරුණ්‍යයේ ආකර්ෂණයත් කිසිම අඩුවක් නැතුව ලැබෙන හිමේන්ගෙන් ආදරේ
ගැන නොඅහා කොහොමද? මේ ආදරේ ගැන අපි අහපු ප්‍රශ්නෙට හිමේන් දීපු
උත්තරේ.
“ආදරේ නම් ඉතින් හැමෝම කියනවා වගේ හරිම සුන්දර දෙයක්.”

*හිමේන්ගේ ජීවිතෙත් ආදරේ සුන්දරද?
“(සිනාසෙමින්) ඒ ගැන මම ඉස්සරහට කියන්නම්කෝ.”
හිමේන් ඉන්නේ හෝමාගම. අම්මා, තාත්තා ඇරුනම ඔහුට ඉන්නේ නංගි
කෙනෙක්ලු. ඉතින් ඒ සියලුදෙනා වගේම ඔහුට මේ තැනට එන්න අතහිත දුන්නු
හැමෝම මතක් කරපු හිමේන් අවසාන වශයෙන් 2025 අලුත් අවුරුද්දේ ඔහුට
තියෙන අලුත්ම බලාපොරොත්තු ගැනත් ‘ධරණී’ට කිව්වා.
“අලුත් අවුරුද්දේ අලුත් බලාපොරොත්තු නම් ගොඩක් තියෙනවා. ඒ අතරින්
මගේ අලුත්ම ටෙලිනාට්‍යයක් එන්න තියෙනවා මෑන් ඔෆ් ද මැච් කියලා. ඒ
වගේම කලර් පෙන්සිල් කියලා චිත්‍රපටයකුත් තිරගත වෙන්න නියමිතව
තියෙනවා. අලුත් ගීත කීපයක් කරන්නත් හිතාගෙන ඉන්නවා.”

හිමේන්ගෙන් අනතුරුව අපි අපේ කතාබහට එකතු කරගත්තේ ‘සිකුරු ඇවිත්’
ටෙලිනාට්‍යයේ අංජලීගේ චරිතය වෙනුවෙන් රංගනයෙන් දායක වෙන ඒ
හැඩකාරියව. සැබෑ නමිනුත් අංජලී වෙන ඇය අංජලී ජයසිංහ.
“මං රඟපෑ පළවැනි ටෙලිනාට්‍ය වුණේ ස්වර්ණවාහිනී නාලිකාවේ විකාශනය
වුණු කෝලම් කුට්ටම. ඒ ටෙලිනාට්‍යයේ වත්සලාගේ චරිතෙන් තමයි රංගනයට
අඩිය තිබ්බේ. ඊටපස්සේ දිගින් දිගටම මට ටෙලිනාට්‍යවලට ආරාධනා
ලැබුණා.”
මේ දිනවල නම් අංජලී ටෙලිනාට්‍ය කිහිපයකින්ම දකින්න පුළුවන්. දෙරණ
නාලිකාවේ සිකුරු ඇවිත් ටෙලිනාට්‍යයට අමතරව ස්වර්ණවාහිනියේ විකාශනය
වෙන සුපුන් රත්නායක අධ්‍යක්ෂණය කරන ජුරාලියා ටෙලිනාට්‍යයේ ජුරාලියා
චරිතයට රංගනයෙන් දායකවෙන්නෙත් අංජලී. ඒ වගේම ඒ නාලිකාවෙම අවසන්
වූ SEE YOU ටෙලිනාට්‍යයෙත් ඇයව අපිට දකින්න ලැබුණා.
“සිකුරු ඇවිත් ටෙලිනාට්‍යය මගේ රංගන ජීවිතයේ හැරවුම් ලක්ෂයක්
කිව්වොත් හරි. මොකද මට ප්‍රධාන චරිතයක් ලැබුණු පළවැනි ටෙලිනාට්‍යය
ඒක.”

*අංජලීට එහි රඟපාන්න ලැබුණු ‘අංජලී’ කියන චරිතය ගැන කිව්වොත්?
“පිටපතේ විදියට අංජලී කියන්නේ නම් එච්චර සමාජයට මුසු නොවුණු
අහිංසක ගෑනු ළමයෙක්. ඇයගෙයි සදෙව්ගෙන් ආදර කතාව තමයි සිකුරු
ඇවිත් එකේ යන්නේ. ඒක හරි ආදරණීය සහ ලස්සන ටෙලිනාට්‍යයක්. මේ
වෙනකොට ප්‍රතිචාර වුණත් හොඳටම හොඳයි.”
රංගන ක්ෂේත්‍රයට නවකයෙක් වුණත් මේ වෙනකොට අංජලී ජනප්‍රිය ටෙලිනාට්‍ය
කිහිපයකම ඉඳලා තියෙන එකේ රඟපාන්න ගිහිල්ලා සිද්ධවුණු අමතක නොවන
සිදුවීම් එහෙම නැද්ද කියලත් නිකමට වගේ අහලා බැලුවා. ඒ වෙලාවෙයි ඇය
පණ බයේ මාදු ගඟේ ඔරු පැදපු කතාවක් අපි එක්ක කිව්වේ.
“කෝලම් කුට්ටම ටෙලිනාට්‍යයෙයි මාදු ගඟේ රූගතකිරීම් තිබුණේ. කාවින්ද්‍යා
දුල්ශානියි මමයි ඔරුව පැදගෙන ගඟේ ගියේ. මං අහලා තිබුණා ඒකෙ
කිඹුල්ලු ඉන්නවා කියලා. ඒත් එක්ක කිඹුලෙක් ඇවිදින් ඔරුව පෙරළයි කියලා
සෑහෙන බයෙනුයි ඔරුව පැද්දේ. ඒක නම් කිසිම දවසක අමතක වෙන එකක්
නැතිවෙයි.”

එදා ඉඳන්ම කියපු සෑහෙන ප්‍රසිද්ධ කතාවක්නේ ගැහැනු ළමයින්ට රංගන
ක්ෂේත්‍රය එච්චර සුදුසු නෑ කියන එක. ඒ ගැනත් අපි අංජලීගෙන් අහලා බැලුවේ
පිටින් ඉඳන් එහෙම කියන අයට වඩා ඒ ක්ෂේත්‍රයේම ඉන්න කෙනෙක් විදියට
අංජලීගේ ළඟ ඒකට හොඳ උත්තරයක් ඇති කියලා හිතිලා.
“ගැහැනු ළමයින්ට රංගන ක්ෂේත්‍රයට එන එක සුදුසු නැත්නම් කවුද කාන්තා
චරිත කරන්නේ? සුදුසු නෑ නෙවෙයි, මේ රංගන ක්ෂේත්‍රයට එන අය දැනගන්න
ඕන හරියට ඉන්න. තමන් හරි විදියට හිටියොත් කිසිම ප්‍රශ්නයක් නෑ. ඔය ටික
දෙනෙක් කරපු කියපු වැඩත් එක්කනේ ඔය වගේ කතාවක් හැදිලා
තියෙන්නේ.”

*අංජලී, නිහතමානීකම නිළියකට කොයිතරම් වටිනවද?
“ගොඩාක් වටිනවා. මොකද නිහතමානී වෙන තරමට තමයි ප්‍රේක්ෂක ආදරය
කියන දේ වැඩිපුර ලැබෙන්නේ. ප්‍රේක්ෂක ආදරේ තමයි ලබාගන්න අමාරුම දේ.
ඒ වුණත් නිහතමානී වුණොත් ඒක ඉබේම ලැබෙනවා. ඒ නිසා මං නම්
නිහතමානී ගුණය රැකගෙන තමයි නිළියක් විදියට මේ ගමන යන්නේ.”
අංජලීට ලැබෙන ප්‍රේක්ෂක ආදරේ අස්සේ විශේෂ කෙනෙක්ගෙන් ලැබෙන
ආදරයක් එහෙම නැද්ද කියලත් අහලා බලන්න හිතු‍ණේ අංජලීගෙන් ඒ වගක්
නොඇහුවා නම් කතාබහ අසම්පූර්ණයි කියලා හැඟුනු නිසා.
“(සිනාසෙමින්) තාම නම් එහෙම විශේෂ කෙනෙක් නෑ.”
අංජලීගේ ගෙවල් මහනුවරලු. ඒ වගේම අම්මයි තාත්තයි ඇරුනම ඇයට ඉන්නේ
නංගි කෙනෙක්ලු. ඉතින් ඔවුන් වගේම ආදරණීය ප්‍රේක්ෂකයොත් ආදරෙන් මතක්
කරපු අංජලී, ‘ධරණී’ කියවන පාඨකයින්ටත් අලුත් අවුරුද්ද වෙනුවෙන් සුබ
ප්‍රාර්ථනා එකතු කරන්න අමතක කළේ නෑ.
“අලුත් අවුරුද්ද මට නම් සුබයි. මොකද ජනවාරි 01 වැනිදාම මට ධරණී කවරේ
වෙනුවෙන් පෙනී ඉන්න ලැබුණා. ඉතින් මට වගේම ධරණී කියවන
හැමෝටමත් ලැබුවා වූ මේ අලුත් අවුරුද්ද සුබ අලුත් අවුරුද්දක් වේවා කියලා
මම හදවතින්ම  ප්‍රාර්ථනා කරනවා.”

රුවන් එස්.සෙනවිරත්න

ඡායාරූප – චමත් ඒකනායක
හැඩගැන්වීම – ධනංජය දිසානායක, මහරගම
ඇඳුම් නිර්මාණය – ප්‍රනීත් රණවීර, බොරලැස්ගමුව