ස්තූතියි කියනවා මිසක් මම කිසිම දවසක දෙවියන්ට මගේ දුක කියන්නේ නෑ

සතුටු කූඩුවක, සතුටු මනුස්සයෙක් වෙලා ජීවත්වෙන්න පුළුවන් නම්…
අපොයි පුළුවන්…
කොහොමද ඒ..??
කාලය ප්‍රයෝජනවත් විදියට කළමනාකරණය කරගෙන, තමන්ට අවශ්‍යම අය විතරක් තමන් වටා ඉතුරු
කරගෙන, ජීවිතේ යුතුකම් වගකීම් කරන ගමන් තමන්වත් ලස්සනට බලාගත්තාම, තමන්ට කියලා පුංචි
ආදායමක් හදාගත්තාම, දුක සන්තාපය අහිමිවීම් වගේ දේවල් අනිත් මිනිස්සුන්ට මතක් නොකර සතුට
විතරක් දන්දෙන්න පුරුදු වුණාම, අනිත් අය එක්ක හැමවෙලාවෙම තමන්ව ගලපන්න නොගියාම මුළු
ජීවිතේම සතුටු කලාපයක් වෙනවා.
තමන්ට ලැබිලා තියෙන ජීවිතේ ගැන තෘප්තිමත් නැතිව නිතර දුක සහ විෂ සමාජගත කරනකොට, විෂ
සහිත මිනිස්සු එක්ක කල්ලි ගැහෙනකොට, අනුන් මත යැපෙනකොට, මිනිස්සුන්ගේ අඩුපාඩු හොය හොය
ඉන්නකොට, තමන් විතරක් නෙමෙයි තමන්ගේ කූඩුවත් අසතුටින් පිරෙනවා.
මගේ ජීවිතේ මම මුල්ම තැන දෙන්නේ මට සතුටින් ඉන්න මේ විශ්වය ලබාදුන් දේවල්වලට
ස්තූතිවන්තවීමටයි. අවුරුද්දක් උදාවෙන මුල්ම දවසේ මම මුලින්ම කරන්නේ හිරු දෙවියන්ට
ස්තූතිවන්තවීමයි. මේ වෙනුවෙන් මම හිරු දෙවියන්ට අපූරු ස්තූති පූජාවක් කරනවා.
ජනවාරි පළවැනිදා උදෙන්ම නාලා පිරිසිදු වෙලා ඉරඑළිය යන්තම්වත් වැටෙන්න කලින් මැටි හෝ තඹ කුඩා
මුට්ටියකට පිරිසිදු ජලය පුරවනවා. ඒකට පිරිසිදු කිතුල් හකුරු කුඩු මේස හැන්දක්, කැකුලු හාල් මේස
හැන්දක් දානවා. කහ පාට හරි තැඹිලි පාට මල් පෙති කඩලා ඒකටම දානවා. ඊටපස්සේ ඒක ඉර ලස්සනට
පායාගෙන එන වෙලාවට දොහොත් මුදුනට අරන් ඉර පැත්තට වතුර ටික හෙමින් හෙමින් බිමට වැටෙන
විදියට හිරු දෙවියන්ට පූජා කරනවා.

කිසිවක් නොපතාම ඔබ අපට ලබාදෙන මේ ආලෝකයට උණුසුමට ස්තූති වේවා… නොයෙකුත්
රෝගාබාධවලින් අප රකිනවාට ස්තූති වේවා කියලා ප්‍රාර්ථනා කරනවා… වසර පුරා ඔබ දීප්තිමත්ව
සෑම උදෑසනකම පැමිණේවා කියලා ඉල්ලා සිටිනවා…
අපේ හිත හරියට කිරිබතක් වගේ වෙන්න ඕනේ. ඒ කියන්නේ පිරිසිදු බව, රහ, සුවඳ හැමදේම තියෙන්න
ඕනේ. සුබ කටයුතුවලදී ඒ නිසානේ අපි කිරිබත් හදන්නේ.
ඊළඟට උදාවෙන්න තියෙන්නේ 2025 අලුත් අවුරුද්දේ ජනවාරි පළවැනිදා. ජනවාරි පළවැනිදාට අපේ ගෙදර
මුල්ම දානමය පූජාව සිද්ධ වෙන්නේ සම්මා සම්බුදුරජාණන් වහන්සේටය. ඒක සුවඳැල් කිරිආහාරයක්. බුදුන්
වහන්සේට කිරිපිඬු දානය සකස් කරලා පූජා කරලා මේ සම්බුද්ධ ශාසනයත් ඔබ වහන්සේගේ ධර්මයත්
චිරාත් කාලයක් වැජඹේවා කියලා මම ප්‍රාර්ථනා කරනවා.
ඊටපස්සේ මම ස්තූති කරන්නේ මගේ ඉෂ්ට දේවතාවන් වහන්සේලාට. ගොඩක් ඉස්සර තමන්ගේ
ග්‍රහයාට අනුව තමන්ගේ ඉෂ්ට දේවතාවන් කවුද කියලා මට තෝරලා දුන්නේ මගේ අම්මාගේ අම්මා.
අත්තම්මා. ඊටපස්සේ මගේ ගෘහයට අධිපති දෙවියන්ට. මොකද මගේ ගෙදර සතුටින් සමාදානයෙන්
තියන්නේ, අපිව හොඳමග යවමින් ඉදිරි මොහොත ඉවෙන් මෙන් දක්වන්නේ උන්වහන්සේ කියලා මට කියලා
දුන්නෙත් අත්තම්මා.
මම හැම අඟහරුවාදාවකම කෝවිල් යනවා. මම රිසි සේ දෙවියන් වඳින්නේ කොවිලේදි. ඒ පුංචි ලස්සන දේව
රූප එක්ක මම හරියට කතා කරනවා. ඒ මල් සුවඳ, විලවුන් සුවඳවල් එක්ක එයාලගෙ ලෝකවලට යනවා.
මමත් හරි ලස්සට ඇඳලා තෝඩු දාලා එයාලටම කැපෙන්නයි දේවාලේ යන්නේ. දෙවියන්ට මම කිසිම දවසක
මගේ දුකක් කියන්නේ නෑ. ඒ වෙනුවට මට පහසු කරලා දීපු මේ ජීවිතේට මම ස්තූති කරනවා. හැබැයි
පත්තිනි මෑණියන්ට, දුර්ගා මෑණියන්ට කියනවා මුහුදෙන් එහා ඉන්න මගේ සුදු මැණිකේත් සුදු පුතාත් හරි
හරියට පරෙස්සම් කරලා දෙන්න කියලා. මොකද මට හිතූ හිතූ වෙලාවට එයාලව දකින්න යන්න බැරි නිසා.
දෙවියන් ඇදහීම වගේ දේවල් සම්බන්ධව ඔබ ළඟ විවිධ මති මතාන්තර තියෙන්න පුළුවන්. හැබැයි කාටවත්
කරදරයක් පීඩාවක් නොවී, අන්තගාමී නොවී, තමන්ගේ හිතට ගතට සැනසීම දෙන ඇදහීමක නිරත වෙන
එකේ වරදක් මමනම් දකින්නේ නැහැ.
මිනිස්සු ගොඩක් මානසික ආතතියට පත්වෙන්නෙ තමන් ළඟ නැති දේවල් ඇති බව පෙන්වන්න ගියාම. ධනය,
දේපල විතරක් නෙවෙයි තමන් තුළ සමහර මිනිස්සු වෙනුවෙන් ඉපදෙන්න හිතලාවත් නැති අවංකකම,
කරුණාව ඇති බව පෙන්වන්න පවා සමහරු පුදුම වෑයමක් දරනවා. ඒක හරි අපහසු දෙයක්.
තමන්ට ළඟම, තමන්ට ඇත්තටම ආදරේ කරන අයගෙන් ළඟම කවයක් හදාගත්තාම එවැනි මවාපෑම් කරන්න
අවශ්‍ය නෑ කියලයි මට හිතෙන්නේ. ළඟම කවය කියන්නේ අපේ ගෙදර අය. ඊළඟ කවයේ අපට සමාන අපේ
හිතේ කොතනක හරි තියාගන්න කැමති, අපට මානසික සුවයක් වෙන කිහිපදෙනෙක්.
මේ ජීවිතයේ අපට අවශ්‍ය ගෙවෙන මොහොත මානසික සුවයෙන් හිඳීම මිසක් අවසානයේ සුවයෙන් හිඳීම
නොවෙයි. අවසානයට සුවයෙන් හිඳින්නට නම් දැන් සිටම එය පුහුණු කළ යුතුයි. වර්තමානයේ සුවයෙන්
සිටිය යුතුයි. කරදර, මානසික පීඩන දුරු කරගෙන දවස ගෙවීමට හුරුවිය යුතුයි.

ඒ නිසා අලුත් අවුරුද්දට පුංචි ටාගට් ටිකක් එකතු කරගමු. අමතර ආදායමක් උපයාගන්න නිවසේ සිටම
මොනවද කරන්නේ කියලා හිතමු. මහන්සි වී උත්සාහවන්ත වී සිතා බැලුවොත් ස්වයං රැකියාවක්,
ඔන්ලයින් සේවාවක්, සාත්තු සේවයක්, දිවා සුරැකුම් මධ්‍යස්ථානයක්, පුංචි පොත් සාප්පුවක්,
රූපලාවණ්‍ය කටයුතු, මල් වගාව, කෙසෙල් වගාව, සෝලා තාක්ෂණය ආදී බොහෝ දේවල් අතරින් අපට
කළ හැකි සුදුසුම එක මුණගැසිය හැකියි.
ඉතින් ඒ විදියට 2025 ලස්සනම ලස්සන වෙන්න මෙන්න මේ විදියේ අදහස් ටිකක් මම ඔබ වෙනුවෙන් ලියලා
තියන්නම්.
ජීවිතේ හිස්වෙන්න කලින් හැමදේම විඳින්න.
රෙදිවලින් වහලා තියෙන ලස්සන පුටු සැටියේ ඒ රෙදි ඉවත් කරලා සැනසිල්ලේ ඉඳගන්න.
කබඩ්වල අහුරලා තියෙන ලස්සනම පිඟන් එළියට අරගෙන අද දවසේ ඒවායේ බත් කන්න.
ගල්වෙලා හයිවෙලා වීදුරු කබඩ් ඇතුළේ තියෙන වටිනා කෝප්පවල උණුවෙන් කෝපි එකක් බොන්න.
කබඩ්වල ගොඩගහලා තියෙන රත්තරන් පාට සිල්වර් පාට හැඳිවලින් අදම කිරිපැණි කන්න.
හොඳම කර්ට්න් ටික, ලස්සනම බෙඩ්ෂීට් ටික දාලා ඒවාවල ලස්සන විඳින්න.
සුවඳ ඉටිපන්දම් ගල්වෙලා යයි. ඒ නිසා ලෝභ නැතුව දල්වන්න.
ඕනම ඇඳුම් ටික තියාගෙන අනිත් ටික ලස්සනට අහුරලා කොලොන් ටිකක් දාලා කාට හරි දෙන්න.
හොඳම පාවහන් ටික එළියට ගන්න. ඒවා පලඳින්න.
හොඳම පර්ෆියුම් එක ගල්වන්න. ඕවා ඉතුරු කරන එකේ තේරුමක් නෑ. අපි කැමති සුවඳට තව කවුරුවත්ම
කැමති නොවෙන්නත් පුළුවන්.
හොඳම දේ කන්න. හොඳම දේ බොන්න.
තමන් වෙනුවෙන් මහන්සි වුණ ජීවිතේ තමන්ට සලකගන්න.
දරුවන්ට කියලා එකතු කරපු දේවල් දැන්වත් දරුවන්ට දීලා දාන්න.
ගේ ඇතුළේ පුළුවන් තරම් හිස් අවකාශය වැඩි කරන්න. මානසික සුවය උදෙසාම ළඟම පරිසරය වෙනස්
කරගන්න.
දන්න කාලේ ඉඳලම කළේ හම්බ කරන එක, එකතු කරන එක, මහන්සි වුණ එක නිසා දැන්වත් නිවී
සැනසිල්ලේ ඒවා එකින් එක විඳින්න.
ආත්මය සනසගන්න.

තමන් සතු හැමදෙයක්ම විඳලා සතුටින් ඉන්නකොට ජීවිතේ කා එක්කවත් ඇරියස් නෑ. ආත්මය හරි
තෘප්තිමත්. හිත හරිම ලස්සනයි.
ජනාලි මදුරසිංහ