“එහේ ගොඩක් අය හිතාගෙන හිටියෙ ලංකාව ඉන්දියාවේ කොටසක් කියලා” ‘The Voice of Finland’ තරඟයේ ඔසරියක් ඇඳ සිංහලෙන් ගී ගැයූ උපෙන්ද්‍රා
නීලමනීගේ පෙම්වතා මා තුං…
මේ දෙන්නා උන්නේ දඹානේ ආදිවාසී ගම්පොජ්ජක. එහෙ උන්දැල පෙම් පලහිලව්වක් මන්දො කරගත්තු ගමන් කදමලු බැඳගෙන යක්ගමට මංගච්චනවා. නීලමනියි මා තුනුයි දෙන්නත් ඔහොම යක්ගමට යද්දි මූණු පොජ්ජ ඉස්සරහට ආපු මීමුන් කැලක් මෙල්ල කරපු මා තුං මීමෙකුගෙ පිටේ නැග්ගා. නැගලා නීලමනීවත් මීමගෙ පිටට නග්ගගත්තා.
ඔය අතරේ ගෝවිදු වනය හරහා යන ගමනෙදි, රෑ බතට ගව ගාතක් කෑ හැකි බවත් මා තුං නීලමනීට මතක් කරනවලු. මේ උන්දැල දෙන්න යක්ගම ගිහින් ඇවිල්ල දැන් සෑහෙන කල්. හැබැයි,
මාමීනි මාමිනි මා දෙයියා
(දෙයියා දෙයියා දෙයියා දෙයියා
දෙයියා දෙයියා දෙයියා දෙයියා)
කාබේන් පාබල යක්ගම වේ…
යමු දෙන්නා
කියලා මේ දෙන්නගෙ ගමන ගැන අදටත් වේදිකාවල ගැයෙනවා.
ලංකාවෙ විතරක් නම් බැරියැ, පින්ලන්තෙ රියැලිටි ගායන වේදිකාවකත් මේ ගීතය ගැයුනට පස්සේ අපිට ඒ ගැන ලිපි පොජ්ජක් පළ නොකර ඉන්න බැරි වුණා ආයුබෝවන්ඩ! මේ කියන්න යන්නෙ පින්ලන්ත රියැලිටි ගායන තරඟ වේදිකාවක ඒ ගීතය ගයපු අපේ කැකුළි ගැන. ඒකිගෙ නම තමයි උපේන්ද්‍රා සිරිවර්ධන.
‘The Voice of Finland’ නම් පින්ලන්තයේ පැවැත්වෙන එම රියැලිටි ගායනා තරඟයේදී අපේ ආරෙට ඔසරියකින් සැරසුණු උපේන්ද්‍රා ගීය ඇරඹුවේ වැදි සනුහරේ මා තුංගේ ආරයට හූවක් ද තබාය. ඒ හූවෙන් විනාඩියක් යන්නට මත්තෙන් ඇයට පිටුපා සිටි විනිසුරුවෙක් බර්සරය නාදකොට ඇය දෙසට හැරුණේය. මේ ඔබට කියන්නට යන්නේ එතැනින් පසු සිදුවූ දෙය ගැන මා ඇගෙන් අසා දැනගත් කතාවයි.
“ගීතය කියලා අවසන් වෙද්දිම විනිසුරු මඬුල්ල මට එකදිගට ප්‍රතිචාර දක්වන්න පටන්ගත්තා. ඒ අතරේ මම ගීතය ආරම්භ කරද්දිම බර්සරය නාද කරපු විනිසුරුවරයාත් අදහස් පළකළා. මගේ හඬ ඇහෙද්දි ඔහුට හිතුණේ හරිම වෘත්තීය හඬක්, මං මේ වෙලාවේ අනිවාර්යයෙන්ම මේ තරඟකාරිනිය වෙනුවෙන් හැරෙන්න ඕනෙ කියලාලු. ඔහු හැරුණේ මම ගීතය ආරම්භ කරලා තත්පර පහක් ගතවෙද්දියි. ඒ තරම් අවම කාලෙකින් තරඟකරුවෙක් වෙනුවෙන් විනිසුරුවරයෙක් හැරුණු පළමු වතාව එය බවයි සංවිධායකවරු මට කිව්වේ.”
පින්ලන්ත තරඟ වේදිකාවකදී එලෙස ප්‍රශංසා ලද උපේන්ද්‍රාගේ උපන්ගම මොනරාගල ය. මොනරාගලට සමුදී මීට වසර 2කට ඉහතදී ඇය පින්ලන්තය බලා ගියේ ඉංජිනේරුවෙකු වූ සැමියාගේ වැඩිදුර අධ්‍යාපන කටයුතු සඳහාය.
“පින්ලන්තයට එන්න කලින් මම සෞන්දර්ය කලා විශ්වවිද්‍යාලයේ සංගීත අංශයෙන් ප්‍රාසාංගික කලා උපාධිය අරගෙන හිටියේ. ඊටපස්සේ අවුරුදු 2ක් විතර ලංකාවේ රජයේ පාසල් 2ක සංගීත ගුරුවරියක් විදියට සේවය කළා. පස්සේ ගුරු සේවයෙන් ඉවත්වෙලා තමයි පින්ලන්තයේ පදිංචියට ආවේ.”
එදා සිට උපේන්ද්‍රලා දිවි ගෙව්වේ පින්ලන්තයේ කොව්වොලා නමැති ගමකයි. ඈ මේ වනවිට සේවය කරනා දිවා සුරැකුම් මධ්‍යස්ථානය පිහිටා තිබෙන්නේ ද එහිය.
“හැබැයි මුලින්ම අපි මේ ගමට එද්දි අපේ කියලා හඳුන්වලා දෙන්න පුළුවන් කිසිම කෙනෙක් හිටියේ නෑ. අඩුමතරමේ එහෙ අය ලංකාව කියලා රටක් මේ ලෝකේ තියෙනවා කියලා දැනගෙන හිටියෙත් නැහැ. සමහරු හිතාගෙන ඉඳලා තියෙන්නේ ලංකාව කියන්නේ ඉන්දියාවේ කොටසක් කියලා. ඉතින් දේවල් එක්ක අපට ඕනවුණා එහේ මිනිස්සුන්ට සමීපවෙන්න වගේම ඒ අයට ලංකාව ගැන කියන්න. ඉතින් මම ඒ වෙනුවෙන් මගේ ගායන හැකියාව යොදාගත්තා.”
එහි ප්‍රතිඵලයක් ලෙස කොව්වොලා ගමෙහි සාදවලදී සේම ප්‍රසංගවලදී උපේන්ද්‍රාගේ ගායනයන්ට ලැබුණේ වැඩි ඉඩකි. ඉන් උපරිම ප්‍රයෝජන ගත් ඇය ඉංග්‍රීසි, දෙමළ සේම සිංහල ගීත ද ගැයුවාය. පින්ලන්ත වැසියන් ඔවුන්ගේ මව්බස වූ ෆිනිෂ් බසින් ගී ගයද්දී ඇය ද ඒවාට හවුල් වූවාය.
“මම ඒ විදියට ගීත ගායනා කරපු නිසා මට අවස්ථාවක් ලැබුණා කොව්වොලා ගමේ බහුසංස්කෘතික ආයතනයක අධ්‍යක්ෂවරියක් වුණ තායිනා තල්වලා මහත්මියව මුණගැහෙන්න. ඇය මට යෝජනා කළා පින්ලන්තයේ වසර 14ක් තිස්සේ අඛණ්ඩව පැවැත්වෙන ‘The Voice of Finland’ තරඟයට අයැදුම් කරන්න කියලා. අවසානයේ ඇගේ වගේම මගේ සැමියාගේත් සහාය ඇතුව මම ඒ තරඟයට අයැදුම් කළා.”
එහි ප්‍රතිඵලයක් ලෙස ඇය එහි පළමු වටයට මුහුණ දුන්නාය. ඉන් නොනැවතී දෙවන තෙවන වට ද ජය ලබා තරඟයේ ඉදිරිය කරාම යන්නට ඇයට හැකිවුණි.
“මේතාක් පැවැත්වුණ ඒ තරඟ වට හැම එකකදීම අපිට ගායනා කරන්න අවස්ථාව ලබා දුන්නේ එක්කෝ ඉංග්‍රීසි ගීත නැත්නම් පින්ලන්ත වැසියන් ඔවුන්ගේ බස වූ ෆිනිෂ් බසින් ගායනා කරන ගීත. හැබැයි මම මාමිනි මා දෙයියෝ ගීතය ගයනා කරපු තරඟ වටයේදී අපිට අවස්ථාව ලැබුණා කැමති ගීතයක් ගායනා කරන්න. ඉදිරි වටවලදී ඒ අවස්ථාව නොලැබෙන නිසා මම කැමති ගීතයක් විදියට තෝරගත්තේ සිංහල ගීතයක්. ඊටපස්සේ ඒ ගීතයට ගැළපෙන විදියට ඔසරියකින් සැරසෙන්න මම තීරණය කළා. සිංහල ගීත ඒ අයට හුරු නැති නිසා තරඟ වටය ජයග්‍රහණය කරන්න මට ලැබේවි කියලා මට ලොකු බලාපොරොත්තුවක් තිබුණෙ නැහැ. හැබැයි මට ලොකු බලාපොරොත්තුවක් තිබුණා මේ ගීතය ගායනා කිරීමත් එක්ක පින්ලන්ත මිනිස්සු ලංකාව ගැන කතා කරයි කියලා.”
ඇය සිතූ ලෙසටම එය සිදුවූවා පමණක් නොව නොසිතූ ලෙස ඇයට එම තරඟ වටය ජයග්‍රහණය කිරීමට ද හැකිවුණි. දැන් ඇගේ එම ජයග්‍රහණය ගැන නොලියැවුණු නොකියැවුණු රූපවාහිනී නාලිකාවක්, ගුවන්විදුලි නාලිකාවක් සේම පුවත්පතක් පින්ලන්තයේ නැතිතරම්ය.
“ඒ නිසාම මේ දිනවල පින්ලන්ත මිනිස්සු අතරේ මාව ගොඩක් ප්‍රසිද්ධයි. ඒ විදියට මිනිස්සු අතරට යන්න ලැබුණ එක ගැන ගොඩක් සතුටුයි. ඒ සතුට උපරිමෙන් විඳින ගමන් ජය පැරදුම සම සේ විඳ දරාගෙන මේ තරඟාවලියේ ඉදිරි වට සඳහාත් සහභාගීවීමයි දැන් මගේ එකම බලාපොරොත්තුව.”
ඒ පැතුම එලෙසම ඉටුවේවායි කියා ඇයට සුබ පතමින් අපි කතාබහ නිමා කළෙමු.
නෙත්මි තෂාරා