අලුත් ජනපතිගේ මාධ්‍ය ලේකම් තනතුර අවුරුදු 27ක කෙල්ලෙකුට!
ලෝක බලවතා වන අමෙරිකාවේ 60 වැනි ජනාධිපතිවරණය පසුගියදා නිමාවට
පත්වූයේ ඩිමොක්‍රටික් පක්ෂයේ ජනාධිපති අපේක්ෂක වූ කමලා හැරිස්ව පරදා
රිපබ්ලිකන් පක්ෂයේ අපේක්ෂකයා වූ ඩොනල්ඩ් ට්‍රම්ප් එරට ජනපති ධුරයට
පත්වෙමිනි. ඒ දෙවැනි වරටය. ජනාධිපති ධුරයට පත්වී දින කීපයක් තුළදීම ට්‍රම්ප්
තමාගේ කාර්යය මණ්ඩල පත්වීම් කීපයක් සිදුකරගත් අතර එහිදී ලෝක
මට්ටමින් වඩාත් කතාබහට ලක්වූ පත්වීමක් වූයේ ‘ජනාධිපති මාධ්‍ය ලේකම්’
(ධවල මන්දිර මාධ්‍ය ලේකම්) තනතුරයි. ඊට හේතුව ඒ සඳහා ට්‍රම්ප් වයස අවුරුදු
27ක ලාබාල තරුණියක් පත්කරගෙන තිබීමයි. අමෙරිකානු ඉතිහාසයේ මින් පෙර
කිසිඳු අවස්ථාවක එතරම් ලාබාල වයසක පසුවෙන්නකුට ජනාධිපති මාධ්‍ය
ලේකම් තනතුර හිමිවී නැත. එසේ නම් එය හිමිවූ ‘කැරොලයින් ලෙවිට්’ (Karoline
Leavitt) නම් තරුණිය ඊට සුදුස්සෙක් වූයේ කෙසේද? මේ ලිපිය ඒ ගැනය.
අමෙරිකානු ඉතිහාසය තුළ පළමු වරට මාධ්‍ය ලේකම් තනතුර යනුවෙන්
තනතුරක් නම් කෙරුනේ 1929 වසරේ හර්බට් හූවර් නම් ජනාධිපතිවරයාගේ
පාලන සමයේදීය. ඒ අනුව එම තනතුර දැරූ පළමු පුද්ගලයා වූයේ අමෙරිකානු
මාධ්‍යවේදියකු වූ ජෝර්ජ් ඇකර්සන් ය. ඒ තනතුරේ වූ රාජකාරිය වූයේ
ජනපතිගේ ප්‍රකාශ හා රජයේ ප්‍රතිපත්ති ආදිය මාධ්‍ය වෙත ලබාදීමයි.
අමෙරිකානු ඉතිහාසයේ මෙන්ම ලෝක ඉතිහාසයේ තිබූ අඳුරුතම කාල
පරිච්ඡේදය වූ දෙවැනි ලෝක යුද සමය තුළ අමෙරිකානු මාධ්‍ය ලේකම් තනතුර
වගකීම් සහගත ප්‍රබල එකක් විය. එම කාලවකවානුව තුළදී ඉහත කී තනතුර
දරනු ලැබුවේ රාජ්‍ය නිලධාරියෙක් සහ මාධ්‍යවේදියෙක් වූ ස්ටීවන් අර්ලි ය. ඔහු
එම තනතුර දැරුවේ ඒ වනවිට එරටේ ජනාධිපතිව සිටි ෆ්‍රැන්ක්ලින් රූස්වෙල්ට්
ජනාධිපතිවරයා යටතේය.
වසර 78ක් පුරාවට පිරිමි උදවිය විසින් දැරූ ඉහත කී තනතුර පළමුවරට
කාන්තාවකට හිමිවූයේ ජෝර්ජ් ඩබ්ලිව් බුෂ්ගේ පාලන සමයේය. ඒ 2007දී ය. එම
තනතුරට පත්වූ පළමු කාන්තාව වූයේ දේශපාලන විචාරකයෙක්, කතුවරියක් වූ
ඩැනා පෙරිනෝ ය. ඩැනාගෙන් පසුව ඒ තනතුර දෙවැනි වරට හිමිවූයේ සාරා
සැන්ඩර්ස්ටය. ඇගේ පත්කිරීම සිදුකළේ ඩොනල්ඩ් ට්‍රම්ප් විසිනි. ඒ ට්‍රම්ප් එරටේ
මුල්වරට ජනාධිපති ධුරයට පත්වූ 2017 වසරේදීය.
කෙසේ හෝ එතැන් පටන් එරටේ බලයට ආ ජනාධිපතිවරුන් කීපදෙනාම තමාගේ
මාධ්‍ය ලේකම් තනතුර සඳහා පත්කරගත්තේ කාන්තාවන්ය. ඒ අනුව ට්‍රම්ප්ගේ
පළමු ධුර කාලයේදි පිළිවෙලින් සාරා සැන්ඩර්ස්, ස්ටෙෆනි ග්‍රිෂාම් මෙන්ම කෙලී
මැකේනි නම් කාන්තාවන්ට මාධ්‍ය ලේකම් තනතුර හිමිවිය. ට්‍රම්ප්ගෙන් පසු
ජනාධිපති වූ ජෝ බයිඩන් ද තමාගේ ධුර කාලය තුළදී ඊට පත්කරගත්තේ ජෙන්
සාකි සහ කේරින් පෙරී නම් කාන්තාවන් දෙදෙනාය. තවමත් නිල වශයෙන් එරටේ
මාධ්‍ය ලේකම් තනතුර දරන්නේ ‘කෙරින් පෙරී’ විසිනි. ඒ 2025 ජනවාරි 19
තෙක්ය.
කෙරින් පෙරීගේ ධුර කාලය නිමාවූ පසුව 2025 ජනවාරි 20 වැනිදා සිට එම ධුරයේ
අලුතින් වැඩ බාරගැනීම සඳහා නියමිතව සිටින්නේ කැරොලයින් ලෙවිට් නම්
තරුණියයි. එම පත්වීම දැනටමත් ඩොනල්ට් ට්‍රම්ප් විසින් නිල වශයෙන්ම ප්‍රකාශ
කර තිබේ. තවමත් 27 හැවිරිදි වියේ පසුවන කැරොලයින් එම තනතුරේ නිල
වශයෙන් වැඩ බාරගත් පසු එරටේ ජනාධිපති මාධ්‍ය ලේකම් තනතුර සඳහා
පත්කෙරුනු ලාබාලතම පුද්ගලයා බවට ඇය පත්වේ. උපතින් අමෙරිකානු ජාතික
තරුණියක් වන අතර ඇය වෘත්තියෙන් මාධ්‍යවේදිනියක් සහ ලේඛිකාවක් ද වේ.
“කැරොලයින් කියන්නේ ඉතාමත් දක්ෂ හොඳ පෞරුෂයක් තියෙන සහ ඵලදායී
සන්නිවේදන හැකියාවක් තියෙන සුන්දර තරුණියක්. අපි විශ්වාස කරනවා නව
රජයේ සියලුම පණිවිඩ ඇය අමෙරිකානු ජනතාව වෙත විශ්වාසයෙන් අරගෙන
යයි කියලා. ඇය ඇයගේ වැඩේ හරියටම කරයි කියලා අපි විශ්වාස කරනවා.”
ඒ ඩොනල්ඩ් ට්‍රම්ප් ජනාධිපතිගේ නිල ප්‍රකාශයෙකු විසින් පසුගියදා එරටේ
මාධ්‍යයට පැවසූවකි. කෙසේ වුවත් ඇය ජනාධිපති ලේකම් තනතුරට පත්කිරීම
සම්බන්ධව ට්‍රම්ප්ගේ රජයේ ඇතැමුන් ද විශ්මයට පත්ව තිබේ. ඔවුන් පවසන්නේ
ඇයගේ ලාබාල වයස එවන් වගකීමක් ඇති තනතුරක් දැරීමට නුසුදුසු වයසක්
බවයි.
“ඇය ට්‍රම්ප් ජනාධිපති කරන්න සෑහෙන මහන්සි වුණු කෙනෙක්. සුදුසුකම්
අතින් පවා කැරොලයින් ඒ තනතුරට සුදුසුයි කියලයි මං හිතන්නේ. ඒ නිසා
ට්‍රම්ප්ගේ මාධ්‍ය ලේකම් විදියට ඇය පත්වීම කිසි ගැටලුවක් නෑ.”
පසුගියදා එලෙස පවසා තිබුණේ නිමාවූ ජනාධිපතිවරණයේදී ට්‍රම්ප්ගේ ජනාධිපති
ප්‍රචාරණ ව්‍යාපාරයේ ප්‍රචාරණ කටයුතු කළ පුද්ගලයෙකි. කැරොලයින් ද මෙවර
ට්‍රම්ප්ගේ ජනාධිපති ප්‍රචාරණ ව්‍යාපාරයේ ඉදිරිපෙළ සිටි සාමාජිකාවක් වූ අතර
එම ව්‍යාපාරයේ ජාතික මාධ්‍ය ලේකම්වරිය ලෙස කටයුතු කළේ ඇයයි.
1997 අගෝස්තු 24 අමෙරිකාවේ නිව් හැම්ප්ෂයර් ප්‍රාන්තයේ උපත ලැබූ
කැරොලයින් එරට මධ්‍යම කතෝලික උසස් පාසලෙන් අධ්‍යාපනය ලබා 2019 දී
‘සන්නිවේදනය හා දේශපාලන විද්‍යාව’ පිළිබඳ ශ්‍රාස්ත්‍රවේදී උපාධියක් ලබා ඇති
තරුණියකි. පසුව ඇය රැකියාව සඳහා ෆොක්ස් නිව්ස් මාධ්‍යජාලය හා සම්බන්ධ
වී තිබේ. එහි සේවය කරමින් සිටියදීම ධවල මන්දිරයේ ජනාධිපති ලිපි ලේඛන
සම්බන්ධ කාර්යාලයේ සේවය කිරීමටද ඇයට අවස්ථාව හිමිවී ඇත. ඒ වත්මන්
ජනාධිපති ඩොනල්ඩ් ට්‍රම්ප්ගේ පළමු ධුර කාලයේදීය. අනතුරුව ධවල මන්දිරයේම
පුවත්පත් කාර්යාලයේ සහකාර මාධ්‍ය ලේකම්වරිය බවට පත්වූ කැරොලයින්ට
එම තනතුර අහිමිව ගියේ 2020 දී ජෝ බයිඩන් හමුවේ ට්‍රම්ප් ජනාධිපතිවරණය
පරාජයවීමත් සමඟිනි.
ධවල මන්දිරයේ සේවය කිරීමත් සමඟින් දේශපාලන විෂය සම්බන්ධව ඇති වූ
කැමැත්ත නිසා පසුව ඇය 2022 දී තමා උපන් ප්‍රාන්තය වූ නිව් හැම්ප්ෂයර්
ප්‍රාන්තයේ පළමු දිස්ත්‍රික්කය නියෝජනය කරමින් ප්‍රාන්ත මැතිවරණයට ඉදිරිපත් වී
තිබේ. එය ජයගත් කැරොලයින් 2024 දී එරට දිස්ත්‍රික් මැතිවරණයටද ඉදිරිපත්
වුවත් එය පරාජය විය. ඇය රිපබ්ලිකන් පක්ෂය සමඟ එකතුවෙමින් ඩොනල්ඩ්
ට්‍රම්ප්ගේ මැතිවරණ ප්‍රචාරණ කටයුතු සඳහා එකතුවන්නේ ඉන්පසුවය. ඇයට
ඩොනල්ඩ් ට්‍රම්ප්ගේ මාධ්‍ය ලේකම්වරිය බවට පත්වන්නට පාර කැපෙන්නේ එසේ
ආ ගමනේ එක් ප්‍රති‍ඵලයක් ලෙසිනි.
ඩී.පී.වේවැල්පනාව