නපුරු කොල්ලත් ‘පුෂ්පනාරි’ ගිය පාරෙම යයි කියලා මට හිතෙනවා ශේන් මහේෂ් රත්නායක

‘වත්තේ පාට පුෂ්පනාරි… පොට්ටු පීදුනා…
බැද්දේ ගාට කෙට්ටු රෝසි කිට්ටුම වුණා…’

‘වත්තේ පාට පුෂ්පනාරි’ කියන්නේ පසුගිය දවස්වල බොහෝ ජනප්‍රිය වුණු
ගීතයක්. වයස් භේදයක් නැතුව ලොකු පොඩි හැමෝම ඒ ගීතය හරි ආදරෙන්
වැළඳගත්තා. මේ වෙනකොට යූටියුබ් අවකාශයේ මිලියන හතරකට කිට්ටු
නැරඹුම් වාර ගණනක් පසුකරලා තියෙන ඒ ගීතය ගායනා කරන්නේ ශේන්
මහේෂ් රත්නායක. ඔහුගේ ගායන දිවිය උඩු යටිකුරු කරන්න තරම් සමත්වුණු
‘පුෂ්පනාරි’ ගීතය නිසා ශේන් ට ප්‍රසංග වේදිකාව පැත්තෙනුත් ලොකු ඉල්ලුමක්
නිර්මාණය වුණා. ඔන්න මේ දවස්වල ආයෙමත් ශේන් කරළියට ඇවිත්. ඒ
‘පුෂ්පනාරි 02’ එක්ක. තවත් නොබෝ දිනකින් ඒ ගීතය එළිදක්වන බවයි ආරංචි.
ඉතින් ඒ ගැන වගේම ඔහුගේ අලුත්ම සංගීත කටයුතු ගැන අහන්න මෙවර අපි
ශේන්ට කතා කළා.

*ඉතින් ශේන් මේ දවස්වල සංගීත වැඩකටයුතු කොහොමද?
මේ දවස්වලත් සුපුරුදු විදියටම ප්‍රසංග වේදිකාවේ තමයි වැඩි කාලයක්
ගතවෙන්නේ. ගිය සතියේ ඩුබායි සංචාරයක් ගිහින් ආවේ. ලබන අවුරුද්දෙත්

විදෙස් සංචාර කීපයකටම ආරාධනා ලැබිලා තියෙනවා. ‘පුෂ්පනාරි’ කරපු හරියක්
කියලා තමයි ඉතින් මට කියන්න තියෙන්නේ. ගොඩාක් සතුටුයි.

*‘පුෂ්පනාරී’ කියන්නේ ඔබේ පළමු ගීතයද?
(සිනාසෙමින්) අපොයි නෑ. ඊට කලින් මං ගීත 17ක් කළා. ඒත් ඒවා ජනප්‍රිය වුණේ
නෑ. ඒත් ‘පුෂ්පනාරි’ හිතපු නැති විදියට ජනප්‍රිය වුණා. ගොඩක් අය ඒක ආදරෙන්
වැළඳගත්තා. ඇත්තටම කිව්වොත් මං සිංදු බර ගාණක් කළාට පත්තුවුණේ
පුෂ්පනාරි. ඒ ගීතය ලිව්වේ කැලුම් දිසානායක. සංගීතය මංජු ශ්‍රී. මේ වෙද්දි
යූටියුබ්වල ඒ ගීතයට මිලියන 4කට ආසන්නව නැරඹුම් වාර ප්‍රමාණයක්
තියෙනවා.

*‘පුෂ්පනාරි’ ඒ තරම්ම ජනප්‍රිය වුණු හින්දද ‘පුෂ්පනාරි 02’ කරන්න හිතුවේ?
ඔව්. ඒ ගීතය ‘නපුරු කොල්ලා’ විදියට තවත් නොබෝ දවසකින්ම මම අලුත්
අවුරුදු තෑග්ගක් විදියට එළිදක්වන්න බලාපොරොත්තුවෙන් ඉන්නවා. ඒකත්
‘පුෂ්පනාරි’ ගිය පාරෙම යයි කියලා මට හිතෙනවා.

*ප්‍රසංග වේදිකාව උඩ ඔබේ ඒ ගීතය වෙනත් ගායකයෝ ගායනා කරනවා අපි
දැකලා තියෙනවා. ඒක ගැටලුවක් නැද්ද?
අනේ නෑ. මේ වෙනකොටත් ඒක ජනප්‍රිය සංගීත කණ්ඩායම් 25ක් විතර ගායනා
කරනවා. නවක ගායකයොත් ‘පුෂ්පනාරි’ ගායනා කරනවා. ඒ හරහා මගේ ගීතය
තවත් මිනිස්සු අතරට යන නිසා කිසිම විදියකින් මං ඒක ගැටලුවක් කරගෙන
නෑ.

*හැබැයි සමහර ගායක ගායිකාවෝ නම් ඔවුන්ගේ ගීත නවකයෙක් ගායනා
කළොත් නීතිමය ක්‍රියාමාර්ග ගන්නවා?
මගේ ඒ වැඩ නෑ. කවුරු කිව්වත් ගීතය මගේ කියලා මං දන්නවනේ. ඉතින් ඒ
නිසා කවුරු කිව්වත් මට ප්‍රශ්නයක් නෑ.

*ශේන් පාසල් යන කාලේ ඉඳන් හීන මැව්වේ ගායකයෙක් වෙන්නලු නේද?

ඔව් ඔව් පොඩි කාලේ ඉඳන් සංගීතයට ආසයි. ඒ නිසා ගායකයෙක් වෙන්න හීන
දැක්කා. අද ඒ හීනය සැබෑවෙලා තියෙන එක ගැන සතුටුයි.

*පාසල් කාලේ වැඩිපුරම ගුටිකෑවේ සිංදු කියන්න ගිහින් කියන්නේ ඇත්තද?
(සිනාසෙමින්) ඇත්ත. ගුටි කන තරමක් ගුටි කෑවේ පන්තියේදි සිංදු කියන්න
ගිහින්.

*ශේන් ගායන ක්ෂේත්‍රයට ආපු හැටි ගැන කිව්වොත්?
මුලින් කියපු විදියට පුංචි කාලේ ඉඳන් තිබුණේ ගායකයෙක් වෙන හීනයක්. ඒ
නිසා සෑහෙන දුෂ්කරතා කැපකිරීම් මැද ආපු ගමනක් මේක. මං පළවැනි දෙවැනි
ගීත ජනප්‍රිය වුණේ නෑනේ කියලා නිකන් හරි මේ ආපු ගමන අත්හැරලා දැම්මා
නම් අද ‘ශේන්’ කියලා ගායකයෙක් නෑ.

*ඔබ සමහරක් ගායකයින්ගේ හඬ අනුකරණය කරනවා නේද?
ඔව් ජනප්‍රිය ගායකයෝ කීපදෙනෙක්ගේ හඬට සමාන හඬින් මේ වෙනකොට මට
ගීත ගායනා කරන්න පුළුවන්.

*ඔබේ පියා ජීවතුන් අතර නෑ. අද පුතාගේ වැඩ බලන්න ඔහු හිටියා නම්
කියලා හිතෙන්නේ නැද්ද?
2014 දි තාත්තා නැතිවුණේ. එයා හිටියා නම් අද මං ඉන්න තැන දැකලා හුඟාක්
සතුටුවෙයි. තාත්තා නැතිවුණත් හරි මං පසුගිය අවුරුදු 10ට මගේ උපන්දිනේට
කේක් කපලා නෑ. ඒත් එයා කොහේහරි ඉඳන් මං ඉන්න තැන දැකලා සතුටුවෙයි
හිතලා මේ සැරේ කැපුවා.

*ශේන්ගේ ගීතවලට වැඩිපුර කැමති ගෑනු ළමයි කියන්නේ ඇත්තද?
මට තේරෙන විදියට පොදුවේ හැමෝම කැමතියි. ඒක කියන්න තේරෙන්නේ නෑ.

*මේ වෙනකොට ඔබට පෙම්වතියක් නම් නැතිවෙන්න බෑ?

(සිනාසෙමින්) නෑ තාම පෙම්වතියක් නෑ.

රුවන් එස්.සෙනවිරත්න