මට අවුරුදු 60ක් කියලා පේනවද? චන්න පෙරේරා
මීට අවුරුදු 19කට කලින් (2006) දිවයින පුරා සිනමාශාලාවල සාර්ථකව තිරගත වුණු හරි ආදරණීය චිත්‍රපටයක් තමයි ‘අංජලිකා’ කියන්නේ. එහි ප්‍රධාන චරිත නිරූපණය කළේ එම චිත්‍රපටයේ අධ්‍යක්ෂකවරයා වුණු චන්න පෙරේරාත් සමඟින් ජනප්‍රිය ඉන්දියානු නිළි පූජා උමාශංකර්. එතැනින් පස්සේ චන්න 2014 අවුරුද්දේ ‘කල්පාන්තේ සිහිනයක්’ චිත්‍රපටයත් 2023 දි ‘යුගාත්‍රා’ චිත්‍රපටයත් අධ්‍යක්ෂණය කරමින් ප්‍රධාන නළුවාගේ චරිතවලට රංගනයෙන් දායක වුණා. මේ චිත්‍රපට එකින් එක අතරේ ලොකු කාල පරතරයක් තිබුණත් චන්නගේ කඩවසම් පෙනුමේ නම් කිසිම වෙනසක් දකින්න ලැබුණේ නෑ. අදටත් චන්න දකින ඕනෑම කෙනෙකුට මුලින්ම ඇතිවෙන ගැටලුව ඒක. ඒ නිසාම ඔන්න මේ දිනවල චන්නගේ වයසත්, වයසට නොගියපු ඔහුගේ කඩවසම් පෙනුමත් ගැන සමාජ මාධ්‍යයේ ලොකු කතාබහක් ඇතිවෙලා. ඉතින් ඒ නිසාම මේ පාර අපි චන්න පෙරේරා එක්ක ටිකක් කතා කළා.
*ඉතින් චන්න මේ දවස්වල කලා කටයුතු කොහොමද?
‘සිහින අනන්තේ’ කියලා චිත්‍රපටයකුයි තව ‘එකයි දෙකයි තුනයි’ කියලා ළමා චිත්‍රපටයකුයි ඉදිරියේදී තිරගත වෙන්න තියෙනවා. ඊට අමතරව මේ අවුරුද්දේ මැද තව ළමා චිත්‍රපටයක් අධ්‍යක්ෂණය කරන්න බලාපොරොත්තුවෙන් ඉන්නවා.
*ඔබ මොනතරම් චිත්‍රපට හැදුවත් අදටත් ජනප්‍රිය ‘අංජලිකා’ නේද?
ඔව් ‘අංජලිකා’ කියන්නේ කිසිම වයස් භේදයක් නැතුව මිනිස්සු හරි ආදරෙන් වැ‍ළ‍ඳගත්ත චිත්‍රපටයක්. අදටත් හරිම ආසාවෙන් ‘අංජලිකා’ නරඹන අය අපේ රටේ ඉන්නවා. ඒ චිත්‍රපටය නිර්මාණය කරනකොට මට ඕන වුණේ අපේ තිබුණු සිනමාවට අලුත් හැඩයක් එක්ක පොඩි වෙනසක් කරන්න. මං හිතනවා මට ඒක කරන්න පුළුවන් වුණා කියලා.
*ඇත්තටම ඒකට ‘පූජා උමාශංකර්’ වගේ ඉන්දීය නිළියක් තෝරාගත්තේ මොකද?
මට ‘අංජලිකා’ චිත්‍රපටයට ජාත්‍යන්තර ඉල්ලුමක් ඇති කරන්න ඕන වුණා. ඒක නිසා තමයි පූජා වගේ ඉන්දීය නිළියක් ප්‍රධාන චරිතයට ගත්තේ.
*දැන් පූජා චන්නට කතා කරන්නේ එහෙම නැද්ද?
එහෙම නම් නෑ. හැබැයි පූජා ලංකාවට ආවොත් මුණගැහෙන අවස්ථා නැතුව නෙවෙයි. ඔය ඉවෙන්ට්ස් වගේ දේවල් එක්ක එහෙම මුණගැහෙන වෙලාවල් තියෙනවා.
*රංගනයෙන් කලාවට ආපු චන්න අධ්‍යක්ෂණයට අතගැහුවේ මොකද?
මං අධ්‍යක්ෂකවරයා කියන භූමිකාවට එදා ඉඳන්ම ආසයි. ඒ නිසා තමයි මමත් ටෙලිනාට්‍ය, චිත්‍රපට අධ්‍යක්ෂණය කළේ.
*අධ්‍යක්ෂකවරයාට චන්න පෙරේරා කියන කඩවසම් නළුවා වැහුනද කියලා මට හිතෙනවා?
මගේ චිත්‍රපටවල මං රඟපෑවා. ඒ වුණත් වෙනත් අධ්‍යක්ෂකවරුන්ගේ නිර්මාණ සඳහා මාව ගන්න එක අඩුවුණා. හේතුව මං චිත්‍රපට අධ්‍යක්ෂණය කරලා තියෙන හින්දා එයාලගේ අධ්‍යක්ෂණ කාර්යයට මම අතදායි වගේ ඒවා හිතලා. ඒත් ඉතින් මං එහෙම නෑ.
*චන්නගේ පෙනුමත් එක්ක කාන්තා ආකර්ෂණයෙන් නම් අඩුවක් නෑ නේද?
(සිනාසෙමින්) එහෙම හිතෙනවා ඉතින්.
*ඒ අතරේ අමතක නොවන ප්‍රතිචාර එහෙමත් ඇති?
ඔව් දැනට අවුරුදු කීපයකට කලින් මං බහරේන්වල ප්‍රසංගයකට ගියා. ගිගින් වාහනෙන් බහිද්දි තරුණියන් පිරිසක් ඇවිත් එකපාරට මාව වටකරගත්තා. ඒ වගේ දෙයක් මං බලාපොරොත්තු වුණේ නෑ. අන්තිමේ මං ප්‍රසංගය තිබුණු හෝල් එකට ආරක්ෂකයෝ එක්ක ගියේ කරේ තියාගෙන. එදා මට හිතාගන්න බැරිවුණා.
*මේ දවස්වල චන්න ගැන කවුරුත් කතා කරනවා?
ඔව් ඔව් මමත් දැක්කා අවුරුදු හැටක් වුණාට මගේ පෙනුම තරුණයි කියලා කට්ටිය ෆේස්බුක් එකේ විවිධ පෝස්ට් පළකරනවා. මමත් ඒවා බලනවා. සමහරක් ඒවා කියවද්දි මගේ ඇස්වලට කඳුළු ආවා. ඇත්තමයි මට මේ ලැබෙන ආදරේ නම් හිතාගන්න බෑ.
*ඇත්තටම චන්නට වයස හැටක්ද?
(සිනාසෙමින්) එච්චර පේනවද? හැබැයි අවංකවම තාමත් හැටක් නම් වුණේ නෑ. තවම 59යි.
*ඒ වුණාට ඔබේ සැබෑම වයසට වඩා පෙනුම සෑහෙන තරුණයි. චන්න පෙනුම රැකගන්න කියලා විශේෂ යමක් එහෙම කරනවද?
මම හදවතේ ආදරය පුරවගෙන ඉන්න කෙනෙක්. ඊර්ෂ්‍යාව, වෛරය, ක්‍රෝධය වගේ දේවල් මගේ ගාව නෑ. ඒ වගේමයි අනවශ්‍ය කුණු කන්දල් හිතේ නෑ. හරිම සැහැල්ලුවෙන් ඉන්නේ. එතකොට ඉතින් වයසට යන්නේ නෑ.
*අවසාන වශයෙන් ඔබේ රසිකයින් වෙනුවෙන් ඔබට කියන්න දෙයක් ඇති?
මේ වෙලාවේ මමත් ඔවුන්ට හදවතින්ම ආදරෙයි කියලා කියනවා. ඒ වගේම ඔය දෙන ආදරේ වෙනසක් නැතුව ඉදිරියටත් මං බලාපොරොත්තු වෙනවා.
රුවන් එස්.සෙනවිරත්න