මොන පැත්තෙන් බැලුවත් මම දැන් පෙම්වතියක් තමයි
මේ දිනවල ටෙලි තිරයේ ජනප්‍රිය වූ ආදර අන්දර කොතෙකුත් ඇත. ඒ අතර දෙරණ නාලිකාවේ විකාශනය වන දෙවෙනි ඉනිම, දෙවැනි කොටසේ සමාධි-අනුහස් ආදර කතාව ප්‍රේක්ෂකයන්ට නුහුරු නුපුරුදු එකක් නොවේ. එහි අනුහස්ට පණ පොවන්නේ ජනප්‍රිය රංගන ශිල්පී රවීන් කවිෂ්ක වන අතර ඔහුගේ පෙම්වතිය, සමාධි ලෙස රංගනයෙන් දායක වන්නේ නවක රංගන ශිල්පිනී තත්සරණි පියුමිකා ය. ඉතින් අද අපේ මේ කෙටි පිළිසඳර ඇය සමඟිනි.
*කොහොමද මේ දවස්වල දවස ගෙවෙන්නේ?
මේ දවස්වල නම් මම ටිකක් කාර්යබහුල වෙලා ඉන්නේ. අනිත් එක මේ ගෙවෙන්නේ අවුරුද්දේ මුල්ම දවස් කිහිපය නිසා වැඩසටහන් කිහිපයකටම සහභාගී වෙන්න වුණා. ඊට අමතරව ටෙලිනාට්‍යය තුනකම මේ දවස්වල රූගතකිරීම් සිද්ධ වෙනවා.
*ඒ ටෙලිනාට්‍ය තුනේ නමුත් කියාගෙන යමුද?
දෙරණ නාලිකාවේ විකාශය වෙන දෙවෙනි ඉනිම, සිරස නාලිකාවේ ආලවන්ත ටෙලිනාට්‍ය වගේම ස්වර්ණවාහිනියේ ජුරාලියා කියන ටෙලිනාට්‍ය තුනට තමයි මේ දවස්වල මම රංගනයෙන් දායක වෙලා ඉන්නේ.
*ඒ අතරින් දෙවෙනි ඉනිමේ සමාධි කියන්නේ ඔබ ප්‍රධාන චරිතයක් රඟපාපු පළවැනි අවස්ථාව නේද?
ඔව්. ඒ චරිතය තමයි මම ප්‍රධාන චරිතයක් සඳහා රංගනයෙන් දායක වුණ පළවැනි අවස්ථාව.
*සමාධිගේ චරිතයට ලැබෙන ප්‍රේක්ෂක ප්‍රතිචාර කොහොමද?
හරිම ආදරණීය ප්‍රතිචාර තමයි ලැබෙන්නේ. ප්‍රේක්ෂකයන් චරිතය තදින්ම අල්ලගෙන ඉන්න නිසාද මන්දා චරිතයේ පුංචි වෙනස්වීමක් වුණ ගමන් සමහර වෙලාවට බැනුම් අහන්න වෙන අවස්ථා නැතුවම නෙමෙයි. (සිනාසෙමින්)
*මෙතෙක් රංගනයෙන් දායක නොවුණ ඒත් රඟපාන්න ලැබුණා නම් කියලා හිතෙන චරිතයක් කියන්න කිව්වොත්?
මම ආසයි කවදහරි දවසක ගොළු චරිතයක් හරි අන්ධ චරිතයක් හරි රඟපන්න ලැබෙනවා නම්.
*තත්සරණිට හොඳට හින්දි භාෂාව හසුරුවන්න පුළුවන් කියන කතාව ඇත්තක්ද?
ඔව්. මට හින්දි භාෂාව ලියන්න වගේම කතා කරන්නත් පුළුවන්. මොකද මම පාසලේදී විෂයක් විදියට සාමාන්‍ය පෙළට වගේම උසස් පෙළටත් හින්දි භාෂාව හැදෑරුවා. උසස්පෙළෙන් පස්සේ හින්දි සංස්කෘතික මධ්‍යස්ථානයෙන් වැඩිදුරටත් හින්දි භාෂාව හදාරන්න හැකියාව ලැබුණා. ඊටපස්සේ හින්දි භාෂාව පිළිබඳ දුරකතන මධ්‍යස්ථානයක දුරකතන නියමුවරියක් විදියට වැඩ කළා. ඊටපස්සේ 2021 අවුරුද්දේ ඒ රැකියාවට සමුදෙන්න සිද්ධ වුණා.
*රැකියාවට සමුදෙන්න විශේෂ හේතුවක් තිබුණද?
රංගනයට පිවිසීමත් එක්ක මට ඒ රැකියාවට සමුදෙන්න සිද්ධ වුණා. මොකද පාසල් කාලේ ඉඳලම මගේ එකම හීනේ වුණේ කවදහරි දවසක ලංකාවේ ජනප්‍රිය නිළියක් වෙනවා කියන එකයි. හැබැයි ඒ හීනෙට මුල ඉඳන්ම ගෙදරින් අවසර ලැබුණේ නැහැ. එහෙමයි කියලා මම මගේ හීනේ අතහැරියෙත් නැහැ. ඒකෙ ප්‍රතිඵලයක් විදියට තමයි 2021 අවුරුද්දේ ස්වාධීන රූපවාහිනී නාලිකාව සංවිධානය කරපු අවුරුදු කුමරිය තරඟයට අයැදුම් කරන්න හිතුවේ. අවුරුදු කුමරිය තරඟයට සහභාගී වෙලා අවසන් 12 දෙනා අතරට පැමිණීමත් එක්ක මට පාර දිගේ ටෙලිනාට්‍යයේ රඟපාන්න අවස්ථාව උදාවුණා. හැබැයි මම රඟපානවට මුලදී තාත්තා ඒ තරම් කැමති වුණේ නැහැ. ඒත් කල්ගතවෙද්දී අම්මත් එක්ක රූගතකිරීම්වලට සහභාගී වෙන්න කියන කොන්දේසියත් එක්ක තාත්තගේ කැමැත්ත ලැබුණා. ඒ විදියට රංගනයට පිවිසීමත් එක්ක ඒ ක්ෂේත්‍රයෙන් ඉදිරියට යන්න හිතාගෙන රැකියාවට සමුදුන්නා.
*ඒ කියන්නේ ඔබේ ඉදිරි බලාපොරොත්තුවත් දිගටම රංගනයේ නිරත වෙන එක?
දැනට නම් රංගනයෙන් ඉදිරියට යාම තමයි මගේ එකම බලාපොරොත්තුව. ඉදිරියේදී මොන හේතුව මත ඒ තීරණේ වෙනස් වෙයිද කියන්න නම් දන්නේ නැහැ.
*ඒ අතරේ හින්දි භාෂාවෙන් ඉදිරියට යන්න බලාපොරොත්තුවක් නැද්ද?
හින්දි භාෂාවෙනුත් ඉදිරියට ගමනක් යන්න බලාපොරොත්තුවෙන් ඉන්නවා. මේ වෙද්දි හින්දි භාෂාව පිළිබඳ ලංකාවේ ඩිප්ලෝමාවක් හදාරලා තියෙන්නේ. ඒ ඩිප්ලෝමාවේ වැඩිදුර අධ්‍යාපන කටයුතු සඳහා විදේශගත වෙන්න ඉදිරියේදී බලාපොරොත්තුවෙන් ඉන්නවා.
රිදී තිරයෙනුත් ඔබව දකින්න ලැබේවිද?
පසුගිය වසරේ සුනිල් ප්‍රේමරත්න සර්ගේ අමුතු ගුරුකම් කියන කොමඩි චිත්‍රපටයේ රූගතකිරීම්වලට සම්බන්ධ වුණා. මම ඒ චිත්‍රපටයේ රඟපෑවේ ජයනි සේනානායක මිස්ගෙයි කුමාර තිරිමාදුර සර්ගේ දුව විදියට. ඒක නිසා නුදුරේදීම පුංචි තිරයෙන් විතරක් දැකපු මාව ප්‍රේක්ෂකයන්ට රිදී තිරයෙනුත් දැකගන්න ලැබේවි.
*ඔබ හැර පවුලේ තව කවුද ඉන්නේ?
අම්මා, තාත්තා, මල්ලි.
*ඔබ පෙම්වතියක්ද?
මේ වෙද්දී දුවෙක් විදියට අම්මාගේ සහ තාත්තාගේ ආදරය ලබනවා. ඒ අතරේ අක්කා කෙනෙක් විදියට මල්ලිගෙන් ආදරය ලබනවා. යාළුවොන්ගේ ආදරයත් ඒ අතරේ මට ලැබෙනවා. ඉතිං මට ඒ හැමෝගෙම ආදරය ලැබෙන නිසා මම හැම අතින්ම පෙම්වතියක් කියලා මට හිතෙනවා.
නෙත්මි තෂාරා