බෙල්ල හැඩට තියාගන්න ගොඩක් දේවල් කරන්න පුළුවන්

වයස්ගතවීමත් සමඟ සම රැලි වැටීම සාමාන්‍ය දෙයකි. එහිදී මුහුණ, බෙල්ල සහ අත්වල රැලි කැපී පෙනෙන අතර, අද අප කතා කරන්නට බලාපොරොත්තු වන්නේ බෙල්ලේ සම ආශ්‍රිතව ඇතිවන එවැනි ගැටළු කිහිපයක් සම්බන්ධයෙනි.

බෙල්ලේ සම ලිහිල්වීම, එල්ලා වැටීම, නිකට යට තෙල් තැන්පත් වීම (Double Chin) හේතුවෙන් නිකට දෙකක් මෙන් දිස්වීමද බොහෝදෙනෙකුට ඇති ගැටළුය. ඒ අනුව ගෙලෙහි සම වැහැරීම, උපතින් ඇතිවූ රැලි රේඛා ඉවත්කිරීම, ඉන්නන් ලප කැළැල් ආදිය ඉවත් කිරීම සඳහා ඇති අවස්ථා කෙබඳුද යන්න විශේෂඥ ප්ලාස්ටික් ශල්‍ය වෛද්‍ය කවින්ද රාජපක්ෂ මහතා මෙවර පැහැදිලි කරයි.

කෙනෙකුගේ ආකර්ෂණීය බවට ගෙලෙහි (බෙල්ලේ) පෙනුමත් බලපානවා. වයස්ගතවීමට අමතරව, බෙල්ලේ පෙනුම වෙනස්වීමට බලපාන අනෙකුත් කාරණා මොනවද?

ඇත්තටම වයස්ගතවීම කියන්නේ ස්වභාවික තත්ත්වයක්. ඊට සෑම අයෙකුටම යම් දවසක මුහුණදීමට සිදුවෙනවා. ඒ වගේම වයසට යාම සමඟ කොලජන් ප්‍රමාණය අඩුවී සම ලිහිල්වීමට, දුර්වලවීමට පටන් ගන්නවා. කෙනෙකුගේ ජානමය හේතුත් ඊට බලපාන අවස්ථා තිබෙනවා. ඒ වගේම තරබාරු අයෙක් කෙට්ටු වු‍ණොත්, එම අවස්ථාවේදී ගෙලෙහි රැලි මතු වෙනවා. ඩබල් චින් කියන තත්ත්වය නම් තරුණ වයසේ සිට බොහෝදෙනෙකු තුළ දැකිය හැකි තත්ත්වයක්. සිරුර තරබාරු වෙද්දී නිකට යට මේදය තැන්පත්වීම නිසා එහෙම දකින්න පුළුවන්. මෙහිදී හනුව කුඩාවට පිහිටා තිබේ නම් ඒ වටා මේදය තැන්පත් වීමට එම ස්වභාවය වැඩිපුර බලපානවා. මෙහිදී ඇතිවන ගැටලු විවිධාකාරයි. එය නිවැරදිව හඳුනාගෙනයි ප්‍රතිකාර ලබාදීම කරන්නේ.

ඩබල් චින් (Double Chin) තත්ත්වයේදී එය මුහුණේ පෙනුමට බලපානවා. එවැනි අයෙකුට ප්‍රතිකාර තීරණය කරන්නේ කොහොමද?

බෙල්ලේ හනුවට යටින් මේදය තැන්පත්වීමකුයි මෙහිදී සිදුවන්නේ. එවිට නිකටවල් දෙකක් ආකාරයට පෙනෙනවා. එන්නත් මගින් එම මේදය දියකර හරින්න පුළුවන්. කෙනෙකුගේ උදරයේ වගේ වැඩි ප්‍රමාණයක් නිකට ආශ්‍රිතව තෙල් තැන්පත්වීමක් සිදුවන්නේ නැහැ. එමනිසා කුඩා ප්‍රමාණයේ තෙල් තට්ටුවක් (ගෙල මුහුණ ආශ්‍රිත) දියකර හැරීම එන්නත් ලබාදීම මගින් කළ හැකියි. එහෙම නැත්නම් ලයිපෝසක්ෂන් (Liposuction) ක්‍රමයට කුඩා සිදුරක් මගින් තෙල් ඉවත්කිරීම සිදු කරනවා. එවිට ගෙලෙහි පෙනුම යළි ආකර්ශනීය ආකාරයට ලබාගැනී‍මේ හැකියාව ලැබෙනවා.

ඒ වගේම තරබාරු වූ විට බෙල්ලේ මාංශ පේශි එල්ලා වැටෙනවා. එය කුඩා ප්‍රමාණයක් නම්, ශල්‍යකර්මයක් සිදු නොකොට සම යටින් නූල් ඇදලා මහන්න පුළුවන්කම තියෙනවා. එහිදී එල්ලා වැටෙන සම මසා එහි පෙනුම පවත්වාගෙන යා හැකියි. එසේ නොමැතිනම් ශල්‍යකර්මයක් මගින් වැඩි සම අයින්කොට මාංශපේශීවලට තබා මැසීම කළ හැකියි. එහිදී බෙල්ලේ මාංශ පේශිවල තීව්‍රතාව ශක්තිමත් කර ගැනීමට ගෙලට ආධාරයක් ලබාදීම අවශ්‍ය වෙනවා.

බෙල්ලේ හරහට තිබෙන රැලි ඉවත් කරන්න එන්නත් මගින් හැකිද?

ඔව්. එන්නත් හෝ ෆිලර් ක්‍රමයට එය ඉවත් කළ හැකියි. මෙම රැලි තිබෙන්නේ සමට යටින්. ඒ වගේම ඒවා ඉවත් කිරීමේදී ගෙල අභ්‍යන්තර අවයවවලට හානිවීමක් නැහැ. බෙල්ලේ සම ලිහිල්වීම කුඩා ප්‍රමාණයක් නම් එම ක්‍රමවේදය වගේම ලේසර් ප්‍රතිකාර ක්‍රමය මගිනුත් ඒ ආශ්‍රිත සම සංකෝචනය කළ හැකියි. ඒ අනුව කුඩා තියුණු රැලි මඟහරවා ගැනීමට ඉන් හැකියාව තිබෙනවා. ඒ වගේම ශල්‍යකර්මයක් මගින් සිදුවන කැළැලක්, එහෙමත් නැත්නම් අනතුරකදී සිදුවන කැළලක් රූපලාවන්‍ය සැත්කමක් මගින් ඉවත් කිරීමට හැකියාව පවතිනවා.

මේ සඳහා කෙරෙන ලේසර් ප්‍රතිකාර ක්‍රමය ආරක්ෂිතද?

ලේසර් ප්‍රතිකාර ක්‍රමය සමට හානිකර නැහැ. ගෙලෙහි සිහින් රේඛා හා රැලි නැතිකොට මනා පෙනුම පවත්වාගෙන යන්න ඒ මගින් උපකාර කරනවා. කොලජන් නිෂ්පාදනයටද එමගින් උත්තේජනයක් ලැබෙනවා. මෙහිදී සම ශක්තිමත් කිරීමකුයි සිදුවෙන්නේ.

බොටොක්ස් ක්‍රමයට ගෙලට සත්කාර ලබාදීමේදී එය දිගින් දිගටම කළ යුතු දෙයක්ද?

ඔව්. වසරකට දෙවතාවක්වත් එය කළ යුතුයි. ලයිපෝසක්ෂන් නම් නැවත තරබාරු වුණේ නැත්නම් එය යළිත් කළ යුතු නැහැ. තරබාරු වුණොත් නැවත එම සත්කාරය ලබාදිය යුතුයි. ගෙලෙහි ඇදෙන සම ඇදලා මහනවා නම් එය වසර දහයක් පමණ පවතිනවා.

ගෙලෙහි කුඩා ඉන්නන් හටගන්න හේතුව කුමක්ද? ඒවා ඉවත් කරන්නේ කොහොමද?

ගෙලෙහි රෝම කූප ආශ්‍රිත සමේ කුඩා ග්‍රන්ථි හිරවීම නිසා වගේම සමේ මැරුණු කොටස් හිරවීම නිසයි බොහෝදුරට ඉන්නන් හා කුඩා ගැටිති හටගන්නේ. මෙය වයස්ගත වෙද්දී වගේම ආරේටත් සිදුවෙනවා. මෙය උඩු සමේ හටගන්නා දෙයක් නිසා කැළලක් නොමැතිව ඉවත් කිරීමට හැකියාව පවතිනවා. එය කළ යුත්තේ කුඩා ශල්‍යකර්මයක් මගින්. ගෙලෙහි සැත්කමක් කී විට බොහෝදෙනා බිය වුවත්, ඇතැම් ප්‍රතිකාර ලබාදෙන්නේ හිරිවට්ටවා බාහිර රෝගී අංශය තුළයි. ලයි​පෝසක්ෂන් වැනි ක්‍රමයකදී නම් සිහි නැතිකර ශල්‍යාගාරයකදී එම කාර්යය කළ යුතුයි. එහිදී සමත්, මාංශ පේශියත් තදවීමට වෙලුමක් යෙදිය යුතුයි. එය සති තුනක්වත් පැළඳ සිටිය යුතුයි.

කොහොම නමුත් මේ ආශ්‍රිත සැත්කම් නිවැරදිව තෝරාබේරාගෙන සිදුකළ යුතුයි. ඒ ඊට හේතුව තෙල් එකතුවක් නිසා වූ දෙයක්ද, මාංශ පේශිවල වෙනසක් නිසා වූවක්ද යන්න නිවැරදිව හඳුනාගැනීම වැදගත් නිසයි.

වයසට ගියත් මේ ආශ්‍රිත ප්‍රතිකර්ම පමා කරන්න ව්‍යායාමත් වැදගත් නේද?

ඔව් ව්‍යායාම ඉතාම වැදගත් වෙනවා. දිනපතා ශරීරයට ව්‍යායාම ලබාදෙනවා වගේම, බෙල්ලටත් විනාඩි කිහිපයක් හෝ ව්‍යායාම ලබාදීම වැදගත් වෙනවා. එමගින් සිදුවන්නේ ගෙලේ මාංශ පේශි දැඩිවීමයි. එසේ සම තදවීමෙන් රැලි මතුවීම හෝ මතුවුණු රැලි ව්‍යායාම මගින් අඩුකරගැනීමේ අවස්ථාව උදා කරනවා. ඒ වගේම සමට අවශ්‍ය පෝෂ්‍ය පදාර්ථ ආහාර මගින් ලබාගැනීමත්, ජලය පානය වගේම සමේ තෙතමනය අවශ්‍ය පරිදි රඳවා ගැනීමත් වැදගත් වෙනවා.

දීපා වසන්ති එදිරිසිංහ