මාළු හොරා කෑමක් නිසා අත්අඩංගුවට ගත් පූසාට ඇප!

අදටත් ලෝකයේ බොහෝදෙනෙක් කම්පාවෙන කතාවක් තමයි අමෙරිකාවේ
'Sparks World Famous Shows' කියන ප්‍රසිද්ධ සර්කස් කණ්ඩායමේ හිටපු බිග් මේරි
කියන ඇතින්නගේ කතාව. සර්කස් කණ්ඩායමේ සතුන් කීපදෙනෙක් හිටියත්
කාගෙත් ආකර්ෂණය දිනාගත්තේ මේ කියන බිග් මේරි. දවසක් ඇත්ගොව්වෙක්
ඇනපු හෙණ්ඩු පහරකට කෝපවුණු මේරි ඒ ඇත්ගොව්වාව පාගලා මැරුවා.
ඉතින් ඒ වරදට දඬුවමක් විදියට බිග් මේරිටත් එරට නීතියෙන් දඬුවමක්
හිමිවුණා. එදා ඇතින්නට හිමිවුණු දඬුවම තමයි ප්‍රසිද්ධ ස්ථානයක එල්ලා මැරීම.
ඒ අනුව එරටේ කාගෙත් සෝ සුසුම් මැද 1916 අවුරුද්දේ සැප්තැම්බර් 16 වැනිදා
මේරිට ඒ මරණ දඬුවම ලබාදුන්නා. ලෝක ඉතිහාසයේ සතෙක්ට ලබාදුන්
අමානුෂිකම දඬුවම විදියටයි බිග් මේරිට ලබාදුන් ඒ දඬුවම සැළකෙන්නේ. ඒ
නිසා අදටත් බිග් මේරිට දුන් දඬුවම ගැන කවුරුත් කතා වෙනවා.
මේරිගේ සිදුවීමෙන් පස්සේ මේරිට වගේ අමානුෂික දඬුවම් නොදුන්නත් විවිධ
කාලවල විවිධ සිදුවීම්වලට සතුන් නීතියේ රැහැනට හසුවෙලා දඬුවම් විඳි
අවස්ථා වාර්තා වුණා. ඒ අතරින් වැඩිපුරම ප්‍රසිද්ධ වුණේ 2017 අවුරුද්දේ
ඉන්දියාවේ බූරු රංචුවක් සිරගත කරපු සිදුවීම.
“ඒ බූරු රංචුව ඇවිත් ඉන්දියාවේ උත්තර් ප්‍රදේශ්වල සිරගෙදර සමීපයේ
හිටවලා තිබුණු වටිනා පැළෑටි තොගයක් කාලා දාලා. උන් කාපු ඒ එක
පැළෑටියක දළ වටිනාකම ඉන්දියානු රුපියල් 60000ක්.”

ඒ තමයි උත්තර් ප්‍රදේශ් සිරගෙදර බලධාරීන් සඳහන් කරලා තිබුණු විදියට බූරු
රංචුවට තිබුණු චෝදනාව. ඒ අනුව බූරු රංචුව වහාම අත්අඩංගුවට ගෙන දින
නියමයක් නොමැතිව උන්ව සිරගත කරන්නටයි බලධාරීන් කටයුතු කළේ. ඒ
නමුත් සතුන්ගේ අයිතිකරු කමලේෂ් නමැත්තා ඉන්දියාවේ භාරතීය ජනතා
පක්ෂ‍යේ දේශපාලනඥයෙකුගේ සහාය ලබාගෙන ඒ දඬුවම දින හතරකට සීමා
කරගත්තා. කොහොමින්හරි බූරු රංචුවට දින හතරක් සිරගෙදර තපින්න වුණා.
ඒ සිදුවීම සම්බන්ධයෙන් සිරගෙදර අධිකාරිවරයා ඉන්දීය මාධ්‍යය වෙත පැවසුවේ
මෙවැන්නක්.
“ඉන්දියාවේ බූරුවෙක් හිරේ දාන නීතියක් නෑ. ඒත් නීතියක් නැතිවුණාට අපි ඒ
බූරු රංචුවව අත්අඩංගුවට අරගෙන හිරේට දැම්මා. මොකද උන් ආහාරයට
අරගෙන තිබුණේ වටිනා පැළෑටි වර්ගයක්. අපි උන් හිරේ දැම්මේ දින නියමයක්
නැතිව. ඒත් උන්ගේ අයිතිකාරයා දේශපාලනඥයෙක් හරහා ඒක ලිහිල්
කරගත්තා. ඇත්තටම බූරු රංචුව හිරේ දැම්මට පස්සේ අපෙන් මාධ්‍ය ඇහුවා
මේ කරපු වැඩේ තේරුම. ඒ කියන්නේ බූරු රංචුවක් හිරේට දාලා අපි
බලාපොරොත්තු වෙන දේ. මං කිව්වා ඒ විදියට කළේ බූරු රංචුවේ
අයිතිකරුවට පාඩමක් උගන්වන්න කියලා. මොකද අපි ඔහුට කීපසැරයක්ම
අවවාද කළා සිර කඳවුර පැත්තට ඒ සත්තු එවන්න එපා කියලා. ඒත් ඔහු
ඒක නොසළකා හැරියා.”
දැනට අවුරුදු හතරකට කලින්, ඒ කියන්නේ 2020 අවුරුද්දේ ලංකාවෙත් සතෙක්ව
පොලිස් භාරයට ගත්ත අපූරු සිදුවීමක් වාර්තා වුණා. ඒ පූසෙක්ව. වරද වුණේ
මෙරටේ ප්‍රසිද්ධ බන්ධනාගාරයක් තුළට හොර රහසේ මත්ද්‍රව්‍ය ගෙනයාමට
කටයුතු කිරීම. ‘පූසෙක්ට එච්චර හරියක් කරන්න පුළුවන්ද?’ කියලා දැන් ඔබට
හිතෙන්න පුළුවන්. ඒ කතාව මෙහෙමයි.
ඒ 2020 අගෝස්තු 01 වැනිදා. එදින පොලිසිය පූසෙක්ව පොලිස් භාරයට ගත්තා.
ඊට හේතුව වුණේ උගේ බෙල්ලේ සූක්ෂම ලෙස සැකකටයුතු පාර්සලයක් ගැටගසා
තිබීම. දන්නවද ඒ පාර්සලයේ තිබුණේ මොනවද කියලා. ඒ තුළ තිබුණේ මෙරට
ප්‍රසිද්ධ බන්ධනාගාරයක් තුළට යැවීමට සූදානම්කොට තිබුණු හෙරොයින් මත්ද්‍රව්‍ය
ග්‍රෑම් 1.7ක්, දුරකතන සිම්පත් දෙකක් සහ මෙමරි කාඩ්පතක්. හැබැයි ඒ වගක්
පූසා දන්නේ නෑනේ. එනිසා ඌව මුදාහරින්නටයි පොලිසිය කටයුතු කළේ.
‘මාළු කූරියෙකු සොරකම් කළ වරදට සැකපිට පූසෙක් අත්අඩංගුවට…’

ඒ තමයි ඉහත කී සිදුවීම් මාලාවට පසුගියදා එකතුවුණු අලුත්ම කතාව. ඒ
කතාව අපට ඇහුනේ තායිලන්තෙන්. මේ වෙනකොට සමාජමාධ්‍ය ඔස්සේ විශාල
වශයෙන් සංසරණය වෙන ඒ හොර පූස් කතාවේ ඇත්ත නැත්ත මේං මෙහෙමයි.
මේ කතාවට සම්බන්ධ සම්බෝල පාට පූසෙක්. පූසෙක් කිව්වට ඇත්තටම ඌ පූස්
තඩියෙක්. දවසක් මේ පූස් තඩියා එරට නගරබද පාරක ඇවිදගෙන යද්දි පාර
අයිනේ නතර කරලා තිබුණු බයික් එකක හැඩල් එකේ මාළු කවරයක් එල්ලලා
තියෙන බව දැක්කා. කවුරුත් පේන්න කාරියත් නැති එකේ පූස් තඩියට මාළු
කූරියෙක් කන්න ආසා හිතෙන්න නැතෑ. ඉතින් විගහින්ම කවරේ ඉරලා මාළු
කුරියෙක් කටින් අරගෙන මේ හාදයා මාරුවුණා. හැබැයි ඒ හැමදේම ළඟ තිබුණු
සීසීටීවී කැමරාවක පටිගත වුණු බව පූස් තඩියා දැනගෙන හිටියේ නෑ. ඔය
අතරෙම තමයි මාළු කවරේ අයිතිකාරයා එතැනට ආවේ.
“කවුද යකෝ මාළු කවරේ ඉරුවේ..?”
එහෙම කියපු ඒ හාදයත් නිකන් හිටියේ නෑ. ඔහු ඒක එතැන හිටපු පොලිස්
නිලධාරියෙක්ට කියලා. ඔන්න ඊටපස්සේ තමයි උන්නැහේ එතැන තිබුණු සීසීටීවී
කැමරාව පරීක්ෂා කළේ. බලද්දි වැඩේ කරලා තියෙන්නේ පූස් තඩියෙක්. පස්සේ ඒ
දර්ශනවල හිටපු පූසා බවට සැක කරන පූසෙක් එරට පොලිසිය විසින්
අල්ලාගත්තා. මාළු කූරියෙක්ව සොරකම් කරපු වරදට සැකපිට පූසෙක්
අත්අඩංගුවට පත්වුණේ ඔන්න ඔහොම.
පසුගියදා මේ සිදුවීම ඔස්ට්‍රේලියාවේ සෙවන් නිවුස් පුවත් සේවය පවා වාර්තා
කරලා තිබුණා. එහිදී ඔවුන් ප්‍රකාශ කළේ තායිලන්තයේ නගරබද ප්‍රදේශයක
ගාල්කර තිබූ යතුරුපැදියක එල්ලා තිබූ මාළු කවරයක් ඉරා පූසෙක් එයින්
මාළුවෙකු සොරාගෙන පැනයන අයුරු ඒ අසළ තිබූ සීසීටීවී කැමරාවක සටහන් වී
තිබෙන බවත්, පසුව තායිලන්ත පොලිසිය එකී සිදුවීමට සැක සහිතව පූසෙක්
පොලිස් අත්අඩංගුවට ගෙන පොලිස් ස්ථානයට රැගෙන ගොස් ඇති බවයි. කෙසේ
වුවත් එම පූසා පොලිස් අත්අඩංගුවට ගෙන රැගෙන යනවිට උගේ කටේ මාළුවකු
නොසිටි බවත් මාළුවෙකු සොරකම් කළ පූසෙකු පොලිසියක් වෙත රැගෙනයාම
සමස්ත පොලිස් සේවයටම කළ නිගාවක් බවත් ඔවුන් එහිදී ප්‍රකාශ කරලා
තිබුණා.
කොහොම වුණත් සමාජ මාධ්‍යයේ අතිශය ප්‍රසිද්ධ පූස් තඩියාගේ වීඩියෝව මේ
වෙනකොට නොබලපු කෙනෙක් නම් නැතුව ඇති. ඒ නිසාම එහි නැරඹුම් වාර
ප්‍රමාණය ලක්ෂ 100 ඉක්මවා ගොස් ඇති බවයි වාර්තා වෙන්නේ.

“ඒක බලද්දි හිනාවෙනවද, ඒ නැත්නම් දුක් වෙනවද කියලා තේරෙන්නේ නෑ. ඒ
කොහොම වුණත් පූස් තඩියා පොලිසියට උස්සන් ගිය එක නම් අනුමත
කරන්න බෑ. ඔය සත්තු කියන ජාතිය එහෙමනේ.”
ඒ තමයි, පූස් තඩියා පොලිසියට උස්සන් යන වීඩියෝව බලපු උදවිය කියන පොදු
කතාව. ඒකෙත් ඇත්තක් නැත්තෙමත් නෑ. හැබැයි මේ වෙද්දි නම් සැකකාරයා
තායිලන්ත පොලිසිය විසින් මුදාහැරලයි තියෙන්නේ. සමහරවිට මේ බළල් හාදයා
දැන් උන්දැගේ පවුලේ උදවියටත් මූණදීගන්න බැරිව වහං වෙලා ඉන්නවා
වෙන්නත් බැරි නෑ.

රුවන් එස්.සෙනවිරත්න