අනාථ නිවාසයෙන් එළියට ඇවිත් කෝටිපතිනියක් වූ කොකෝ

අද වනවිට විලාසිතා ලෝකයේ අතිදැවැන්ත සන්නාමයක් බවට පත්ව තිබෙන
'Chanel' (ෂැනල්) හි නිර්මාතෘවරිය තමයි ‘කොකෝ ෂැනල්.’ ධනවතුන්, වංශවතුන්
තමන්ගේ තත්ත්වය තරාතිරම පෙන්වන්නට ඉතා ඉහළ මිලක් ගෙවා මේ
සන්නාමයට අයත් භාණ්ඩ මිලදී ගත්තත් කොකෝ ෂැනල් කියන්නේනම් එවැනි
වංශවත් හෝ ධනවත් පවුලක ඉපදුණු කාන්තාවක් නෙවෙයි. වයස අවුරුදු හයේ
පටන් ඇය හැදී වැඩුණේ අනාථ නිවාසයක.
නමුත් පසුකාලීනව තමන්ගේ උත්සාහය, අධිෂ්ඨානශීලී බව සහ
නිර්මාණශීලීත්වය තුළින් කාන්තා විලාසිතා ලෝකය සහමුලින්ම වෙනස් කරන්නට
ඇය සමත්වුණා. ඉතින් අනාථ නිවාසයක හැදී වැඩුණත් ලොවක් වසඟ කළ
විලාසිතා සන්නාමයක් බිහිකළ ඒ පෙරළිකාර කාන්තාව ගැනයි මේ කතාව.
1883 අගෝස්තු 19 වැනිදා ප්‍රංශයේදි තමයි ෂැනල් උපත ලැබුවේ. ඇගේ පියා ඒ
වෙද්දී ගෙයින් ගෙට ගිහින් භාණ්ඩ අලෙවි කරන වෙළෙන්දෙක්. ඔය විදියට
කාලය ගතවෙද්දී, ඒ කියන්නේ ෂැනල්ට හරියටම වයස අවුරුදු හයක් වෙද්දී
හරිම අවාසනාවන්ත විදියට ඇගේ මව මියගියා.
උපන් දා පටන් සැපක් විඳලා නොතිබුණු පුංචි ෂැනල්ගේ ජීවිතය එතැනින් එහාට
තවත් කටුක එකක් බවට පත්වුණේ ඇගේ පියා විසින් ඇයව අනාථ නිවාසයකට

භාරකළාට පස්සෙයි. ඉන් පස්සේ ජීවිතේ කවදාවත් ඇයට ඇගේ පියාව
මුණගැහුනේ නැහැ. පුංචි කාලෙම තමන් මුහුණ දීපු අමිහිරි අත්දැකීම් සහ
ආදරය, රැකවරණය අහිමිවීමෙන් ඇතිව තිබූ හිඩැස වහගන්න ෂැනල් කිසිම
දවසක විවාහය තෝරාගත්තේ නෑ. නමුත් ඇය පසුකාලීනව පුද්ගලයින්
කිහිපදෙනෙකු සමඟම ප්‍රේම සම්බන්ධතා පවත්වපු බවනම් දැනගන්න තියෙනවා.
පුංචි ෂැනල් මහන්න ගොතන්න ඉගෙනගත්තෙ ඈ හැදී වැඩුණු අනාථ නිවාසයේදි.
හරිම ආසාවෙන්, උනන්දුවෙන් මහන්න ඉගෙනගන්න මේ පුංචි දැරිවි අනාගතේ
දවසක මුළු විලාසිතා ලෝකයම වෙනස් කරාවි කියලා නම් එදා ඒ අනාථ
නිවාසයේ ඉඳපු කිසි කෙනෙක් හිතන්න නැතුව ඇති.
කොහොම නමුත් වයස අවුරුදු දහඅටේදි අනාථ නිවාසයෙන් ඉවත්වෙලා යන
ෂැනල් කාලයක් සමාජශාලාවල ගායිකාවක් ලෙසත් රැකියාව කළා. අන්න ඒ
සමාජශාලාවලට ආපු සොල්දාදුවො තමයි ලු මුලින්ම ඇයට ‘කොකෝ’ කියලා
ආමන්ත්‍රණය කරන්න පටන්ගත්තේ. නැත්නම් ඇගේ මුල් නම, ගාබ්‍රියෙල්ලා ෂැනල්.
ගාබ්‍රියෙල්ලා ෂැනල්, කොකෝ ෂැනල් වුණේ ඒ විදියට.
ඊටත් අවුරුදු දෙකකට පස්සෙ, ඒ කියන්නේ විසිවන වියේදී ෂැනල් ධනවත් හමුදා
නිලධාරියෙක් වන එතියන් බෙල්සන් සමඟ සබඳතාවයක් ඇති කරගත්තා.
ෂැනල්ට ප්‍රංශයේ කාන්තා ඇඳුම් ව්‍යාපාරයක් ආරම්භ කරන්න උපකාර කළෙත්
ඔහුම තමයි. ඇය වෙනස්ම ආකාරයේ කාන්තා හිස්වැසුම් නිර්මාණය කිරීම
ආරම්භ කළේත් මෙන්න මේ කාලෙදීමයි.
හැබැයි ඉතින් ව්‍යාපාරය ආරම්භ කරන්න උදව් උපකාර කරපු බෙල්සන් එක්ක
ෂැනල් වසර තුනකට වඩා කාලයක් නම් සම්බන්ධතාවය පැවැත්වුවේ නැහැ.
ඊටපස්සේ ඈ ඔහුට වඩා ධනවත් ඔහුගේම මිතුරෙක් වන ඉංග්‍රීසි ජාතික ආතර්
බෝයි චැපල් එක්ක හාදකමක් ඇති කරගත්තා. චැපල් විවාහ වුණාට පස්සෙත්
වසර නවයක් පුරාවට මේ සම්බන්ධය තිබුණා කියලයි කියන්නේ.
පසුව 1910දී බෝයි චැපල්ගේ සහයෝගයත් ඇතුව ෂැනල් ඇගේ පළමු සාප්පුව
විවෘත කළා. මුලින්ම හිස්වැසුම් අලෙවිය පටන්ගත්තත් කාලයත් සමඟම කාන්තා
ඇඳුම් නිර්මාණයටත් යොමුවෙන ඇය ඒත් එක්කම තවත් සාප්පු දෙකක් විවෘත
කළා. මේ කාලෙ වෙනකොට සාම්ප්‍රදායික රාමුවෙන් මිදිලා කාන්තාවන් වෙනුවෙන්
සැහැල්ලු ඇඳුම් නිර්මාණය කළ පළමු විලාසිතා නිර්මාණ ශිල්පිනිය වුණෙත්
ඇයයි. මේ නිසා ඇගේ ඇඳුම් නිර්මාණවලට ඉහළ ඉල්ලුමක් නිර්මාණය වෙලා
තිබුණා.

හැබැයි හැමදේම මේ විදියට හොඳින් සිද්ධ වෙද්දී 1919 වර්ෂයේදී, වාහන
අනතුරකින් බෝයි චැපල් මරණයට පත්වුණා. තමන්ගේ දුකට සැපට සෙවනැල්ල
වගේ ළඟ ඉඳපු මේ ප්‍රේමවන්තයාගේ වියෝව ෂැනල්ගෙ ජීවිතයට දැඩි බලපෑමක්
ඇතිකළ බවයි සඳහන් වෙන්නේ.
“ඔහුගේ මරණය මට දරුණු පීඩාවක් ගෙන දුන්නා. චැපල් අහිමිවීමත් එක්කම
මට සියලු දේම අහිමි වුණා. මම සැබෑ සතුටක් ගෙන දුන්නා කියලා හිතුව
දේවල්වලින් ඉන්පස්සෙ ඇත්තටම සතුටක් ලැබුණෙ නෑ.” චැපල්ගේ මරණය
ඇයට කෙතරම් තදින් බලපෑවද කියන කාරණය ඒ සිදුවීමෙන් වසර 25කට පසුව
ෂැනල් ඇගේ මිතුරියකට කළ මේ ප්‍රකාශයෙන් පැහැදිලි වෙනවා.
නමුත් මේ එක කඩාවැටීමකටවත් ඇගේ ගමන නම් නවත්තන්න පුළුවන් වුණේ
නෑ. 1920 දී ෂැනල් ඇගේ ප්‍රථම සුවඳ විලවුන් නිශ්පාදනය වන 'Chanel No, 05'
ලෝකයට හඳුන්වාදීමෙන් පසුව ඇගේ ව්‍යාපාරය තවදුරටත් පුළුල් වුණා විතරක්
නෙවෙයි ජනතාව අතර කතාවෙන සන්නාමයක් බවටත් පත්වුණා.
ඇයට අනුව නම් “සුවඳ විලවුන් කියන්නෙ විලාසිතාව තුළ තිබෙන
නොපෙනෙන, අමතක කළ නොහැකි, මූලිකම අංගයක්.”
ඉන්පසු ෂැනල්ගේ පෙම්වතා බවට පත්වුණේ වර්තයිමර් කියලා පුද්ගලයෙක්.
පසුකාලීනව ඔහු ඇගේ ව්‍යාපාරික සඟයා බවට ද පත්වුණා. 1925දී කොලර
රහිත ජැකට්ටුව සහ ශරීරයේ හැඩය මනාව ඉස්මතු වන ලෙස නිර්මාණය කරන
ලද සාය ඇය විසින් හඳුන්වා දුන් අතර ඒ දිනවල ෂැනල්ගේ මෙම විලාසිතා
තරමක් විප්ලවකාරී වුණා.
ඇය කාන්තාවන් වෙනුවෙන් නිර්මාණය කළ ඇඳුම් විලාසිතා පිරිමි විලාසිතාවලට
තරමක් සමාන, අනවශ්‍ය විච්චූරණවලින් තොර සරල නමුත් ආකර්ෂණීය
නිර්මාණ ලෙස ගැණුම්කරුවන් අතර ජනප්‍රිය වුණා. බොස්තොරොක්ක සහ ශරීරය
අනවශ්‍ය ලෙස සිරවෙන, ඉහිල් බවක් නොමැති ඇඳුම් විලාසිතාවලට සමුදෙන්නට
කාන්තාවන්ට හැකිවුණේ ෂැනල්ගේ නිර්මාණශීලිත්වය නිසයි.
මේ සියලු දේ කරන අතරතුරේ ඉගෝර් ස්ටැවින්ස්කි නම් රචකයෙකු සමඟත් ඈ
පෙම් සබඳතාවයක් පැවැත්වූ බව සඳහන්.
ඒ වගේම ෂැනල් වංශාධිපතියෙකු සමඟත් දීර්ඝකාලීන සබඳතාවයක් පවත්වලා
තිබෙනවා. නමුත් ඔහු විවාහවීමට යෝජනා කරද්දී ඒ යෝජනාව ප්‍රතික්ෂේප

කරමින් ඇය කියා ඇත්තේ ඕනෑතරම් ආදිපාදවරියන් සිටිය හැකි නමුත් ෂැනල්
නමින් හිඳින්නේ එක් කාන්තාවක් පමණක් බවයි.
ඒ වගේම 1954 වර්ෂය පමණ වෙද්දී ඇය කාන්තාවන් සඳහා තවත් පිරිමි ඇඳුම්
විලාසිතා කිහිපයක්ම හඳුන්වා දෙන්න කටයුතු කළා. කාන්තාවන් සඳහා නාවික
උඩුකබා සහ බෙල්-බොටම් ආදී විලාසිතා නිර්මාණය කරමින් ඇය හොලිවුඩයේ
සුපිරි තාරකාවන්ගෙ සිත් සොරාගන්නත් සමත් වුණා.
විචාරකයින්ගේ විවේචන අඩුවක් නැතුව ලැබුණත්, ෂැනල්ගෙ මේ හරිම සුන්දර
සැහැල්ලු ඇඳුම් විලාසිතා තරුණ නෝනලාගෙ හදවත්වල බොහොම ඉක්මණින්
තැන්පත් වුණේ ආයෙ උදුරලා විසි කරන්න බැරි විදියට.
කිසිදාක විවාහ නොවූ මේ නිර්මාණශීලි, හිතුවක්කාර ගැහැනිය ඇගේ ජීවිතයේ
අවසාන දිනවලත් නිර්මාණ කටයුතුවල නියැලුණා කියලා තමයි දැනගන්න
ලැබෙන්නේ. ඇගේ මරණයෙන් වසර කිහිපයකට පසුව 1982 දී කාල් ලැජෆීල්ඩ්
නමැති පුද්ගලයෙක් ෂැනල්ගේ ව්‍යාපාරය පාලනය ආරම්භ කරමින් ‘ෂැනල්’
නාමය ඉදිරියට ගෙන යාමට අඩිතාලම දැමුවා. ෂැනල් කියන සන්නාමය අද
වනවිට මිලියන සිය ගණනින් ලාබ ලබමින් ලොව පුරා ඉහළ පැලැන්තියේ
කාන්තාවන් අතර ජනප්‍රිය වෙලා තියෙනවා. කාන්තා හිස්වැසුම්, සුවඳ විලවුන්,
ඇඳුම් විලාසිතා විතරක් නෙවෙයි අත්බෑග් සහ පාවහන් ද අද මේ වෙළඳ නාමය
යටතේ නිෂ්පාදනය වෙනවා.
බොහොම කටුක අතීතයක් හිමිවුණු, දෙමව්පිය සෙනෙහසක් හරිහැටි නොලැබුණු,
දිළිඳු දැරියක් විදියට ළමා කාලය ගතකළ ෂැනල්ගෙ විලාසිතා සුපිරි පැලැන්තියෙ
ධනවත් කාන්තාව ඉලක්ක කරගෙන නිර්මාණය වුණු ඒවා. සාමාන්‍ය ආදායමක්
තියෙන අයෙකුට ළඟාවෙන්න බැරි තරමට ඒවායේ මිල අධිකයි. අනවශ්‍ය විසිතුරු
කිරීම්වලින් තොර, සරල සහ වැදගත් විලාසිතා එකතුවක් හඳුන්වා දුන්නු ඇය
‘කාන්තා විලාසිතාව’ නව මානයකට රැගෙන යන්න මූලික අඩිතාලම දැමූ
කාන්තාවක්. ඉතින් තවමත් අඳුරු අතීත කතා අතර අතරමං වෙලා ඉන්න
කාන්තාවන්ට ඇය සැබෑම ආදර්ශයක් කියලා ඔබට හිතෙන්නේ නැද්ද?
ඩී.පී.වේවැල්පනාව