කොරෝනා වෛරස් රෝග ලක්ෂණ ඇත්නම් ලේ දෙන්න යන්න එපා
කොවිඩ් 19 රෝග ලක්ෂණ ඇත්නම් හෝ කොවිඩ් 19 ආසාදිතයෙකුගේ ආශ්‍රිතයෙකු වේ නම් හෝ මාස 3ක් ඇතුළත විදෙස් සංචාරයන්හි නිරතවී තිබේ නම් රුධිර පාරවිලයන මධ්‍යස්ථාන වෙත පැමිණමෙන් වළකින්නැයි ජාතික රුධිර පාරවිලයන මධ්‍යස්ථානයේ අධ්‍යක්ෂ වෛද්‍ය ලක්ෂ්මන් එදිරිසිංහ මහතා ජනතාවගෙන් ඉල්ලා සිටී.
රුධිරය හෝ රුධිර සංඝටක මඟින් කොවිඩ් 19 රෝගය සම්ප්‍රේෂණය වන බව මෙතෙක් වෛද්‍ය විද්‍යාත්මකව තහවුරු නොවුණ ද මෙමඟින් රෝහල් කාර්ය මණ්ඩලයට රෝගය සම්ප්‍රේෂණය වීමේ හැකියාව ඇති බැවින් මෙම ඉල්ලීම කරන බව වෛද්‍යවරයා පැවසීය.
ජාතික රුධිර පාරවිලයන මධ්‍යස්ථානයේ අධ්‍යක්‍ෂකවරයා මේ බව කියා සිටියේ කොවිඩ් 19 වසංගත හමුවේ රුධිර පාරවිලයන මධ්‍යස්ථානයේ කාර්යභාරය පැහැදිලි කිරීම පිණිස රජයේ ප්‍රවෘත්ති දෙපාර්තමේන්තුව සංවිධානය කළ මාධ්‍ය සාකච්ඡාවට අද (13) එක්වෙමින්.