ගැබිනි මව්වරුන් 700කට කොවිඩ් – ඉක්මනින් එන්නත ලබාගන්නැයි උපදෙස්
කෝවිඩ් 19 වෛරසයේ සීඝ‍්‍ර ව්‍යාප්තියත් සමග වෛරසය ආසාදනය වූ ගැබිනි මව්වරුන් 700ක් මේ වන විට රෝහල්ගතව ප‍්‍රතිකාර ලබමින් සිටින බව පවුල් සෞඛ්‍ය කාර්යාංශයේ අධ්‍යක්‍ෂ, විශේෂඥ වෛද්‍ය චිත‍්‍රමාලි ද සිල්වා මහත්මිය පවසනවා.
මේ අතරින් බහුතරයක් ගැබිනි මව්වරුන්, කොරෝනා මර්දන එන්නත ද ලබාගෙන නොමැති බව අනාවරණය වී තිබෙනවා.
විශේෂඥ වෛද්‍යතුමිය සඳහන් කළේ, කෝවිඩ් 19 වෛරසය ආසාදනය වීමෙන් ගැබිනි මව්වරුන් 19 දෙනකු මේ වන විට මරණයට පත්ව ඇති අතර ඔවුන් සියලුම දෙනා එන්නත් ලබාගෙන නොතිබූ බවයි.
මේ අතර දැනට රට තුළ ගැබිනි මව්වරුන් එක්ලක්‍ෂ පනස්දහසත් ලක්‍ෂ දෙකත් අතර පිරිසක් සිටින අතර ඒ අතරින් කොරෝනා මර්දන එන්නතේ එක් මාත‍්‍රාවක් හෝ ලබාගෙන තිබෙනුයේ තිස්දහසක පිරිසක් පමණි.
ඊයේ (11) සෞඛ්‍ය ප‍්‍රවර්ධන කාර්යාංශයේදී පැවැති මාධ්‍ය හමුවකදී ඇය මේ බව සඳහන් කළා.
එහිදී අදහස් දැක්වූ ප‍්‍රසව හා නාරී වෛද්‍ය විශේෂඥයන්ගේ සංගමයේ සභාපති විශේෂඥ වෛද්‍ය ප‍්‍රදීප් සිල්වා මහතා ප්‍රකාශ කළේ, දැනට රෝහල්ගතව සිටි ආසාදිත මව්වරුන් අතරින් එක් එන්නත් මාත‍්‍රාවක් ලබාගෙන සිටින අය සායනික වශයෙන් බරපතළ තත්ත්වයන්ට පත් නොවූ බවයි.
ගැබිනි මව්වරුන් කොරෝනා මර්දන එන්නතේ එක් මාත‍්‍රාවක් ලබා ගැනීම සුදුසු බව එයින් අදහස් නොකරන බවත් මේ මොහොතේ මව්වරුන් කළ යුතුම ක්‍රියාව වන්නේ කොරෝනා මර්දනයට ලබා දෙන එන්නත ලබා ගැනීම බවත් ඔහු වැඩිදුරටත් සඳහන් කළා.
ඒ අනුව ළඟම පිහිටි රජයේ රෝහලින් සහ ප‍්‍රදේශයේ සෞඛ්‍ය වෛද්‍ය නිලධාරී කාර්යාල හෝ මාතෘ සායනවල දී ගැබිනි මව්වරුන්ට එන්නත් ලබා ගැනීමට හැකියාව පවතිනවා.
එසේම රජයේ එන්නත්කරණ වැඩපිළිවෙළ අනුව ගැබිනියක එන්නත්කරණ මධ්‍යස්ථානයකට පැමිණියහොත් ඇයට ප‍්‍රමුඛතාව ලබා දී කටයුතු කරන ලෙස මේ වන විට සෞඛ්‍ය අංශවලට උපදෙස් ලබා දී තිබෙන බව ඒ මහතා ප්‍රකාශ කළා.
මේ වන විට කෝවිඩි 19 වෛරසය ආසාදනය වන ගැබිනි මාතාවන්ට ඇති වන සංකූලතා හමුවේ ඔක්සිජන් ලබා දෙන තත්ත්වයට පත්වීම සහ දැඩි සත්කාර ඒකකයේ ප‍්‍රතිකාර ලබා දීමට සිදුවීම වැඩිවෙමින් පවතින බව ද සෞඛ්‍ය අංශ නිරීක්‍ෂණය කර තිබෙනවා.