ගර්භනී මවුවරුන්ගෙන් සියයට 75කට කොවිඩ් මර්දන එන්නත
ගැබිනි මවුවරුන්ගෙන් සියයට 75ක් සඳහා මේ වන විට කොවිඩ් මර්දන එන්නත් ලබා දී ඇතැයි පවුල් සෞඛ්‍ය කාර්යාංශයේ අධ්‍යක්ෂිකා, විශේෂඥ වෛද්‍ය චිත්‍රමාලී ද සිල්වා මහත්මිය පවසනවා.
විශේෂඥ වෛද්‍ය චිත්‍රමාලි ද සිල්වා මහත්මිය මේ බව පැවසුවේ සෞඛ්‍ය ප්‍රවර්ධන කාර්යාංශයේදී අද (30) පැවති මාධ්‍ය හමුවක් අමතමින්.
මේ අතර ගර්භනී මවුවරුන්ට කොවිඩ් එන්නත් ලබාදීමේ සතියක් ක්‍රියාත්මක අතර එහිදී ද ගැබිණි මවුවරුන් බොහෝ පිරිසක් එන්නත ලබාගත් බවයි එතුමිය සඳහන් කළේ.
මෙහිදී වැඩිදුරටත් අදහස් දැක්වූ එම මහත්මිය සඳහන් කළේ, මෙතෙක් එන්නත් නොගත් අය සිටී නම් එම ප්‍රදේශයේ සායනයට, සෞඛ්‍ය වෛද්‍ය නිලධාරී කාර්යාලයට හෝ රෝහලට ගොස් එන්නත ලබාගන්නැයි තමා ඉල්ලීමක් කරන බවයි.
ගැබිනි මවකට කොවිඩ් ආසාදිත වුවහොත් සංකූලතාවලට ලක්වීමේ ඉඩ ඉතා වැඩි වන අතර මේ වන විට මෙරට කොවිඩ් ආසාදිත ගැබිනි මවුවරුන්ගේ මරණ 32ක් සිදුව තිබෙනවා.
කොවිඩ් ආසාදිත ගැබිනි මවුවරු 900ක් පමණ රෝහල්ගතව දැනටත් ප්‍රතිකාර ලබන බවත්, ආරම්භයේ සිට මේ දක්වා මෙරටින් කොවිඩ් ආසාදිත ගැබිනි මවුවරුන් 4,200ක් පමණ වාර්තා වී ඇති බවත් සඳහන් කළ චිත්‍රමාලි ද සිල්වා මහත්මිය ප්‍රකාශ කළේ,මෙය ඉතා භයානක තත්වයක් බවයි.