කොවිඩ් එන්නතෙන් දරුගැබ අහිමිවන්නේ නැහැ

මේ මස අවසන් සතියතුළ එනම්, 23 සිට 31 වැනිදා දක්වා කාළය තුළ ගැබිනි මව්වරුන් සඳහා ඒන්නත් ලබා දිමේ වැඩපිළිවලක් ආරම්භකර ඇති බව පවුල් සෞඛ්‍ය කාර්යාංශයේ අධ්‍යක්‍ෂ, විශේෂඥ වෛද්‍ය චිත‍්‍රමාලි ද සිල්වා මහත්මිය පවසනවා.

එතුමිය දෙරණ BIG FOCUS වැඩසටහන සමග අද එක්වේමින් වැඩිදුරටත් සඳහන් කළේ ගැබිනි මවිවරුන් විසින් කොරෝනා මර්දන එන්නත ලබා ගැනිමේදි දරු ගැබ පිළිසිඳගෙන සති 12 සම්පුර්ණ වූ පසු එන්නත ලබා ගැනිම වඩාත් සුදුසු බවයි.

මෙහිදි අදහස් දැක්වු ප්‍රසව හා නාරිවේදි විශේෂඥ වෛද්‍ය සනත් ලැනරෝල් මහතා,

“පළමු සති 28 කාළයේදී කොවිඩ් 19 වැළඳුනහොත් එන්නත්කරනයට ලක්ව ඇති මවක් නම් ඇය කිසිසේත්ම බිය විය යුතු නැහැ, ඇයට ගොඩක් රෝගී තත්ත්වයන් සංකූලතාවයන් හා කෝවිඩ් නිව්මෝනියාව සෑදිමට ඇති ඉඩකඩ සහ මරණය ඉතාමත්ම අඩු බව වෛද්‍ය පරික්ෂණ මගින් පෙන්නුම්කර තිබෙනවා. භයානකම තත්ත්වය වන්නේ සති 28 පස්සේ සංකූලතාවයන් තියෙන මව්වරු, අධික රුධිර පීඩනය,ස්වසන රෝග,දිය වැඩියා රෝග සහ වෙනත් රෝග තිබෙන සියලුම මව්වරුන්ට මෙම රෝගය වැළඳුනොත් එම මව්වරුන් නිව්මෝනියා තත්ත්වයට යාමට තිබෙන අවධානම ඉතාමත්ම වැඩියි. එම මව්වරු වුනත් එන්නත්කරනයට ලක්ව තිබෙනවා නම් එම අවදානම ඉතාමත් අඩුයි.”

එසේම කොවිඩ් එන්නත ලබා ගැනිමෙන් දරුගැබ අහිමිවිමක් හෝ කළල විකෘතිතාවක් ඇති වන බව පරික්ෂණ මගින් සනාථවී නොමැති බව වැඩිදුරටත් අදහස් දක්වමින් ඒ මහතා සඳහන් කළා.

මේ අතර කොවිඩ් එන්නත ලබා ගන්නා මව්වරුන් සඳහා සතියේ දිනවල උදෑසන 8 සිට සවස 2 දක්වා කොළඹ කාසල් වීදියේ කාන්තා රෝහලට පැමිණිමෙන් එන්නත ලබාගත හැකි බව විශේෂඥ වෛද්‍ය සනත් ලැනරෝල් මහතා ප්‍රකාශ කළා.