බ්ලීචින් ක්‍රීම්වලින් හානිවුණු සමට සත්කාරයක්
ප්‍රවීණ රූපලාවන්‍ය උපදේශක මාලිංග ප්‍රනාන්දු
Personal Grooming Trainer NVQ 4,5
“අනේ මට ඉක්මනට සුදු වෙන්න පුළුවන් ක්‍රීම් එකක් කියන්නකෝ”
ඉහතින් දැක්වෙන්නේ ස්වභාවයෙන් ලද සමේ පැහැය පිළිබඳව සෑහීමකට පත් නොවන බොහෝ කාන්තාවන්ගේ මුව‍ඟේ රැව්දෙන වාක්‍ය ඛණ්ඩයක්ය.
සුදු වනවා යැයි පැවසුවහොත් වසුරු පිඬක් වුවත් මුහුණේ ආලේප කරගැනීමට අද බොහෝ කාන්තාවන් දෙවරක් සිතා බලන්නේ නැත.
ඇමෙරිකාවේ චර්ම රෝග විශේෂඥ වෛද්‍ය කණ්ඩායමක් සිදුකළ සමීක්ණයකින් හෙළිවූයේ අප්‍රිකානු රටවල කාන්තාවන්ගෙන් 80%ක්ද, ආසියාතික රටවල කාන්තාවන්ගෙන් 40%ක්ද සම සුදු කරගැනීම උදෙසා දිනපතාම සමට අහිතකර දෑ ආලේප කරනා බවය.
කොහොම නමුත් මේ සුදුවීමේ උන්මාදය අදක ඊයෙක ඇති වූවක් නම් නොවේ. අඳුරු සමක් ඇති කාන්තාවන්ට පිරිමින්ගේ ආකර්ෂණය අවම බවට වූ මතවාදයන් නිසා පුරාණ ග්‍රීසියේ සහ රෝමයේ විසූ ඇතැම් කාන්තාවන් සුදු ඊයම්, කාබනේට් සහ රසදිය ආදිය භාවිතා කර සම සුදු කරගැනීමට උත්සාහ ගත් බවට සාක්ෂි ඇත. එසේම සම සුදු කරගැනීමට සමහරුන් ඊයම් ආලේප කළ බවත් ඒවා විෂ වීමෙන් ඇතැමුන් මියගිය බවත් පතපොතේ සඳහන්ය.
18 වන සියවසේ යුරෝපයේ විසූ බොහෝ කාන්තාවන්ගේ සිහිනය වූයේ රංගන ශිල්පිනියක් වීමයි. ඒ නිසාම යුරෝපයේ විසූ අඳුරු සමක් සහිත යුවතියන් සම සුදු කරගැනීම උදෙසා මුහුණේ ‘රසදිය’ ආලේප කර ඇත.
බොහෝ සමාජ විද්‍යාඥයින්ගේ මතය වන්නේ චිත්‍රපට කර්මාන්තය මෙන්ම කළු සුදු භේදයත් කාන්තාවන්ගේ මේ සුදුවීමේ උන්මාදයට උඩගෙඩි දුන් බවය.
“සුදු සමක් තියෙන අයට ලිංගික ආකර්ෂණය වැඩියි කියලා තමයි බහුතරයක් හිතන්නේ. ඒ වගේම සුදු පැහැති සම ධනවත් බවේ සංකේතයක් කියලත් සමාජයේ වැරදි වැටහීමක් තියෙනවා. මේ වගේ නොයෙකුත් හේතු නිසා සුදුවීමේ පිස්සුව අද වෙනකොට ලෝකය පුරාම කාන්තාවන්ගේ ඔලුවලට ඇතුළු වෙලා ඉවරයි.”
එසේ පවසන්නේ ඇමෙරිකාවේ සුප්‍රසිද්ධ සමාජ විද්‍යාඥවරියක වන මාග්‍රට් හන්ටර්ය. ඇය පවසන්නේ මේ දුර්වල තැන හඳුනාගත් කූඨ වෙළෙඳ ව්‍යාපාරිකයන් යම් යම් අහිතකර නිෂ්පාදනවලින් ජයටම මුදල් උපයාගන්නා බවය.
එක රැයකින් සම සුදු කරන බොහෝ රූපලාවන්‍ය නිෂ්පාදනවල සමට අහිතකර රසායනික සංයෝග වන රසදිය සහ ස්ටෙරොයිඩ් අධිමාත්‍රිකව අන්තර්ගත බව මේ වනවිටත් වෛද්‍ය විද්‍යාත්මක තහවුරු කර අවසානය. මේවා දීර්ඝකාලීනව භාවිතයෙන් නොයෙකුත් ආකාරයේ අතුරු ආබාධ පමණක් නොව නැවත හැරවිය නොහැකි භයානක සංකූලතා පවා ඇතිවිය හැකි බව වෛද්‍යවරුන්ගේ මතයයි. එසේම බොහෝ වෛද්‍යවරුන් පවසන පරිදි මෙම ආලේපන දැන් ගෝලීය සෞඛ්‍ය ගැටළුවක් බවටද පත්වී හමාරය. එක රැයින් සම සුදු කරන විවිධ ‘මැජික්’ ආලේපන භාවිතයෙන් ඇතිවිය හැකි අන්තරායන් නිසාම මේ වනවිටත් රටවල් ගණනාවක් ඒවා තහනම් කර ඇත. නමුත් අප්‍රිකානු සහ ආසියාතියක රටවල මේවාට ඇති ඉල්ලුම තව තවත් වැඩි වෙනවා මිසක අඩුවන බවක් නම් පේන තෙක් මානයකවත් නැතිය.
“නොතේරෙන කාලේ මට මගේ කළු හම ගැන ලැජ්ජාවක් තිබුණා. ඒ නිසා යාන්තම් අවුරුදු 12ක් වෙද්දි මම බ්ලීචින් ක්‍රීම් ගාන්න පටන් ගත්තා. කාලයක් යනකොට මගේ මූණේ ලොකු සැරවා ගෙඩි ඇවිල්ලා මගේ මුහුණ විනාශ වුණා. ඊටපස්සේ තමයි මම මගේ ස්වභාවික පැහැයේ වටිනාකම තේරුම් ගත්තේ.”
එසේ පවසන කරිෂ්මා ලෙක්රාස් කෘතිමව සම සුදු කිරීමට විරුද්ධව පෙනී සිටින ඉන්දියානු යුවතියක්ය. ඇය හැකි සෑමවිටම ලොවට හඬගා කියන්නේ සුදුවීමේ උන්මාදය දැන්වත් සුවකරගත යුතු බවය.
අපගේ සමේ පැහැය තීරණය කරන සාධකය වන්නේ සම තුළ අඩංගු මෙලනින් නම් වර්ණකයයි. යුරෝපීය රටවල බොහෝදෙනාගේ සම ස්වභාවිකවම සුදු පැහැ වී ඇත්තේ ඔවුන්ගේ සිරුරේ අඩංගු මෙලනින් ප්‍රමාණය අවම වීම නිසාය. නමුත් අප්‍රිකානු සහ ආසියානු රටවල ජීවත්වන අපගේ සමේ මෙලනින් බහුලය. අපට ස්වභාවයෙන්ම අඳුරු පැහැති සමත් හිමිවීමට හේතුව එයයි.
කෘතිමව සම සුදු කිරීමේදී සිදුවන්නේ පෙර කී අහිතකර රසායනික ද්‍රව්‍යවල බලපෑම නිසා සමේ ඇති මෙලනින් වර්ණ විනාශ වී යාමයි.
කෘතිමව මෙලනින් ඉවත් කිරීමට යාම නිසා හිරුඑළියේ අයහපත් බලපෑම සමට තීව්‍රව දැනෙනා නිසා පසුකාලීනව සමේ පිළිකා ඇතිවීමට පවා මේ තත්ත්වය බලපෑ හැකි බව වෛද්‍ය මතයයි.
කෘතිමව සම සුදු කරගැනීම පිළිබඳව කතා කිරීමේදී ඒවායින් සමට ඇතිවිය හැකි අයහපත් බලපෑම් පිළිබඳවද කතා නොකරම බැරිය.
මේවා දීර්ඝකාලීනව භාවිතයෙන් සම රතුවීම, ගැඹුරු කුරුලෑ, සැරවා ගෙඩි, ලප කැළල් සහ වණ ඇතිවීමට ඉඩ ඇත. එසේම සම වියළීම, අනවශ්‍ය ලෙස සම මෘදු වී සංවේදී වීම වැනි ලක්ෂණද මතුවිය හැකිය.
එසේම ඉක්මනින් වියපත් වීමට සහ පිග්මන්ටේෂන් ඇතිවීමටත් මෙම නිෂ්පාදන දායක වන බව කිව යුතුය.
මෙවැනි ආලේපන භාවිතා කර සමට හානි වූ පසු ඒවාට සමාජ මාධ්‍යවලින් පිළිතුරු සෙවීමට යන යුවතියන්ද එමටය.
එසේම මෙවැනි දේ පිළිබඳව කිසිඳු පළපුරුද්දක් නොමැති පුද්ගලයින් විසින් සිදුකරනු ලබන යූටියුබ් වීඩියෝවල ඇති දෑ නිවසේදී අත්හදා බැලීමට යාමෙන් සිදුවන්නේ ඔබේ සමට තව තවත් හානිවීම පමණක් බව වටහා ගත යුතුය.
කෘතිමව සුදු කිරීමට යාමෙන් හානි වූ සම යථා තත්ත්වයට පත්කරගැනීමට සිතන ඔබට එවැනි ප්‍රතිඵල විරහිත දේ වෙනුවට සැබෑවටම ප්‍රතිඵල ලබාදෙන අනර්ඝ සත්කායරක් පිළිබඳව පහතින් සඳහන්ය.
“අහිතකර රසායනික සංයෝජන අඩංගු ආලේපන වර්ග භාවිතා කරලා මුහුණට හානි කරගත්ත යුවතියන් ඕනතරම් මට හමුවෙනවා. සමහරු සුදු වෙන්න ගිහින් හිටියටත් වඩා කළු වෙලා, තව සමහරුන්ගේ මුහුණේ විශාල ගෙඩි, ලප වගේ නොයෙක් දේ ඇතිවෙලා. ඒ අය වෙනුවෙන්ම අපි දැන් විශේෂිත සත්කාර දෙකක් හඳුන්වලා දීලා තියෙනවා.
සමේ ආකාරය අනුව මේ සත්කාර දෙකෙන් වඩා හොඳ සත්කාරය සිදුකරනවා.
එහි පළමු එක තමයි ‘හයිඩ්‍රේටින් සත්කාරය.’ මේකෙදි අපි කරන්නේ හානිවුණු සමට තෙතමනය ලබාදෙන එකයි. මේකෙන් සම පෝෂණය කරන පෝෂක සංඝටක සම අභ්‍යන්තරයටම ලබාදෙනවා. වාර හයක් කරද්දී බ්ලීචින්වලින් සම හානිවුණාද කියලා හොයාගන්න බැරි තරමට සුවපත් වෙනවා.
ඒ වගේම අපේ අනිත් සත්කාරය තමයි ‘ඔක්සිජන් සත්කාරය.’ මේකෙදි සිදු කරන්නේ සමට වුණු හානිය අවම කිරීම සඳහා සමට ඔක්සිජන් ලබාදීමයි. මේ සත්කාරයත් වාර හයක් කරගැනීම වැදගත්. ඕනම වයසක කෙනෙක්ට මේ සත්කාර කරගන්න පුළුවන්.
බ්ලීචින් ක්‍රීම් ගාලා සුදුවෙන එක ඉතාම තාවකාලිකයි. ක්‍රීම් එක නැවැත්තුව ගමන් සම ආයෙත් කළු වෙනවා. ඒ වගේම ඒවා ඉතාම භයානකයි. සම පැහැපත් කරගන්න දැන් ඕනතරම් තාක්ෂණික ක්‍රමවේද තියෙනවා. ඉතින් තවදුරටත් මේ රසායනික ආලේපන පස්සේ දුවන්න එපා කියන එකත් කියන්නම ඕනේ.”
සෙව්වන්දි හෙට්ටිආරච්චි