ඔලිම්පික් තරඟබිමේ ලකුණු පුවරුව අසරණ කළ PERFECT කෙල්ල
ක්‍රීඩාවේ ස්වරූප විවිධාකාරය. බොහෝවිට ජයග්‍රහණය රඳා පවතින්නේ වේගය සහ ජවය මතයි. ඇතැම් ක්‍රීඩා ඉන් වෙනස් වේ. ජිම්නාස්ටික් යනු එවැනි ඉසව්වකි. එය සම්පූර්ණයෙන්ම රඳා පවතින්නේ විනිසුරන් මතයි. ජිම්නාස්ටික් ක්‍රීඩාවේදී සලකන ප්‍රධාන කරුණක් වන්නේ කිසිවකු සර්ව සම්පූර්ණ නොවන බවයි. එහෙත් රුමේනියානු ක්‍රීඩිකා නදියා කොමනෙචි ඊට අභියෝග කළාය. ඒ, දහහතර හැවිරිදි වියේදී වීම විශේෂත්වයකි.
1976 ඔලිම්පික් තරගාවලිය පැවතියේ කැනඩාවේ මොන්ට්‍රියල් හිදීය. ආරම්භයේ සිටම ජිම්නාස්ටික් ඉසව්වේ අණසක පතුරුවා සිටියේ සෝවියට් දේශයයි. ඔවුන්ගේ ජිම්නාස්ටික් පිල සැලකුණේ සිහින කණ්ඩායම ලෙසිනි. ඒ කණ්ඩායම මොන්ට්‍රියල් වෙත පැමිණියේ රන් අපේක්ෂාව සහිතවය. කෙසේ වෙතත් ප්‍රතිවාදී රුමේනියාව සම්බන්ධයෙන් ඔවුන්ගේ සිතේ වූයේ කණස්සල්ලකි. 1976 තෙක් කාලයේදී රුමේනියාව ඔලිම්පික් හිදී ජිම්නාස්ටික් ඉසව්වෙන් දිනාසිටියේ ලෝකඩ පදක්කමක් පමණි. ඔවුන් සෝවියට් දේශයේ බියට හේතුවූයේ කුඩා නදියා කොමනෙචි නිසාය.
නදියා පිළිබඳ ජිම්නාස්ටික් ලොව අවධානය යොමුවූයේ 1975 යූරෝපීය ශූරතාවලියේදීය. එහි ඉසව් 5කට ඉදිරිපත් වූ ඈ ඉන් හතරක්ම ජයගත්තාය.
1961 නොවැම්බර් දොළොස්වනදා රුමේනියාවේ ඔනෙස්ටිහිදී නදියා කොමනෙචි උපත ලැබුවාය. ඈ ජිම්නාස්ටික් පුහුණුව ආරම්භ කළේ වයස අවුරුදු හයේදීයි. ඒ, සුප්‍රසිද්ධ ජිම්නාස්ටික් පුහුණුකරුවන් වූ බෙලා සහ මාර්තා කැරොලි යුවළ යටතේය. බෙලා සහ මාර්තා දක්ෂයින් හඳුනාගැනීමේ තියුණු හැකියාවෙන් යුක්තය. රුමේනියා ජාතික කනිෂ්ඨ කණ්ඩායම ඉලක්ක කරගනිමින් ඔවුහු පුහුණුවීම් කළහ.
නදියාගේ දක්ෂතා මැනැවින් හඳුනාගත් පුහුණුකරුවෝ ඇය කෙරෙහි දැඩි අවධානයක් යොමු කළෝය. කැරොලි ඇකඩමිය තුළ තාරකාවක් වීමට නදියාට වැඩි කලක් ගත නොවීය. ඒ, හැකියාව සේම දැඩි කැපවීම නිසාය. ඇය දිනකට පැය හය බැගින් සතියට දින පහක් පුහුණුවීම් කළාය.
වයස අවුරුදු අටක් පමණක් වනවිට නදියා කොමනෙචි රුමේනියාවේ කනිෂ්ඨ ජාතික ශූරතාවලියට ඉදිරිපත් වූවාය. එහිදී ඇයට හිමිවූයේ දහතුන් වන ස්ථානයයි. ඊට වසරකට පසුව, වයස අවුරුදු නවයේදී නදියා ජාතික ශූරිය බවට පත්වූවාය. 1975 දී ජ්‍යේෂ්ඨ ශූරතාව නියෝජනය කරන තෙක් ඈ කනිෂ්ඨ ශූරතා රැසකට හිමිකම් කීවාය. 1975 වසරේදීම නදියා යුරෝපීය ශූරතාවට ඉදිරිපත් වූවාය. ඒ පළමු වරටයි. එහිදී ඒකල ඉසව් තුනක ජය සහ සමස්ත ශූරතාව ඇයට හිමිවිය.
නදියාගේ ප්‍රථම ඇමරිකානු සංචාරය ද සිදුවූයේ 1975 දීය. ඔලිම්පික් තරගාවලියට පෙර එහිදී ඇය ජයග්‍රහණ කිහිපයකටම හිමිකම් ලද්දාය.
මේ තොරතුරු සමඟ කැනඩාවට පැමිණි සෝවියට් සිහින කණ්ඩායමේ අවධානය නදියාට යොමුවිය.
කවර හෝ ක්‍රීඩාවක ජයග්‍රහණයේදී අතපසුවීමකට ඉඩ නැත. ජිම්නාස්ටික් වැනි ඉසව්වලදී එය විශේෂිතය. ඒ, අතපසුවීමක්, අනතුරක් නිර්මාණය කිරීමේ වැඩි ඉඩක්ද පවතින බැවිනි. නදියා කොමනෙචිගේ ක්‍රීඩා දිවියේ අතපසුවීම් නැත. ඇගේ විශේෂත්වය එයයි.
මොන්ට්‍රියල්හිදී නදියාගේ තරගවැදීම විශ්මයජනකය. ඇගේ ඉසව් දැකීමට පෙර කිසිවකු එවැන්නක් විශ්වාස නොකළ බවද ස්ථිරය. සර්ව සම්පූර්ණ කිසිවෙකුත් නැතැයි සැලකූ ජිම්නාස්ටික් ක්‍රීඩාවේ ඈ සර්ව සම්පූර්ණ වූවාය.
අනිවාර්ය uneven bars වටයේදී ඇයට සමස්ත ලකුණු හිමිවිය. ඇගේ ඉදිරිපත් කිරීම් හමුවේ ප්‍රතිවාදී ක්‍රීඩිකාවන් පමණක් නොව ලකුණු පුවරුවද අසරණ විය. ඒ ඇය තාක්ෂණයටද අභියෝග කළ බැවිනි. පුවරුවේ ඉඩ තිබුණේ ඉලක්කම් තුනකට පමණි. කිසිදා කිසිවකු සමස්ත ලකුණ ලබා නොගන්නා බවට වූ විශ්වාසය ඊට හේතුවයි. ඒ අනුව 10.00 ලෙස සටහන් විය යුතු පුවරුව පෙන්නුම් කෙරුණේ 1.00 ලෙසිනි. එහෙත් විනිසුරු මඩුල්ල ඉන් අදහස් කළේ ඇය සම්පූර්ණ ලකුණු ලැබූ බවයි. ඔලිම්පික් ජිම්නාස්ටික් ඉතිහාසයේ එවැන්නක් සිදුවූ පළමු අවස්ථාව එයයි. ඒ දස්කම දැක්වූ දහහතර හැවිරිදි නදියා එතැන් පටන් ලොව පුරා ප්‍රචලිත වූයේ ‘PERFECT 10 GIRL’ ලෙසිනි. එහිදී තවත් අදියර පහකදීම ඇය සම්පූර්ණ ලකුණ (PERFECT 10) ලබාගැනීම විශේෂත්වයකි. මොන්ට්‍රියල් ඔලිම්පික් අවසන ලොවම මවිත කළ මෙම ළාබාල දැරිය තමාගේ නම ඉදිරියේ ඒකල රන් පදක්කම් තුනක් සහ ලෝකඩ පදක්කමක් සටහන් කළාය. සමස්ත ශූරතාවට හිමි රන් පදක්කමද ඒ අතර විය. කණ්ඩායම් ඉසව්වෙන් රිදී පදක්කමකි.
මොන්ට්‍රියල් ඔලිම්පික් උළෙලින් පසු නදියා කොමනෙචි ලෝකයේම කතාබහට ලක්වූවාය. ඇගේ රුවින් පුවත්පත්, සඟරා මුල් පිටු සැරසිණි.
ඉන් වසර හතරකට පසු මොස්කව් වෙත ඇය පැමිණෙන්නේ ඇගේ දෙවන ඔලිම්පික් සහභාගිත්වයටයි. එහිදී ඒකල රන් පදක්කම් දෙකක් දිනාගැනීමට ඈ සමත් වන්නීය. ඒ, සිය ඔලිම්පික් රන් එකතුව පහක් දක්වා ඉහළ දමමිනි. කෙසේ වෙතත් සිය සමස්ත ශූරතාව රැකගැනීමට ඇය සමත් වන්නේ නැත. එම තීරණය ඇය ලබන්නේ විනිසුරු මඩුල්ලේ විනාඩි 28ක තර්ක විතර්කයන්ගෙන් පසුවය.
ලොවක් විස්මයට පත්කළ නදියා ක්‍රීඩාවෙන් සමුගන්නේ 1984දීය. ඒ වනවිට ඇයට ඔලිම්පික් රන් පදක්කම් පහකි. රිදී තුනක් සහ ලෝකඩ පදක්කමක්ද හිමිය. 1989 දී ඇමරිකාවේ පදිංචියට යන නදියා අමරිකානු ජිම්නාස්ටික් ශූරයකු වූ බාර්ට් කානර් සමඟ විවාහ වෙයි.
1996 දී නදියා කොමනෙචි අන්තර්ජාතික ජිම්නාස්ටික් විශිෂ්ටයන්ගේ නාම ලේඛනයටද එක් වන්නීය. ඇය ජිම්නාස්ටික් ක්‍රීඩාවේ විස්මිත වෙනස්කම් කළ ක්‍රීඩිකාවකි. නව තාක්ෂණ ක්‍රමවේද ඈ විසින් හඳුන්වා දෙනු ලැබුවාය. සිමෝන් බයිල්ස් වැනි ක්‍රීඩිකාවන් ඉදිරියට ගෙන යන්නේ ඇගේ ඒ අපූර්ව ක්‍රීඩා විලාසයයි.
ඈ තැබූ වාර්තා කිසිවකුටත් බිඳ හෙලිය නොහැක. දහහතර හැවිරිදි දැරියකට ඔලිම්පික් බිමේ මේ දක්ෂතාව දැක්විය නොහැක. ඒ, මේ වනවිට ජිම්නාස්ටික් සඳහා ඔලිම්පික් සුදුසුකම් ලැබීමට වයස අවුරුදු දහසය සම්පූර්ණ විය යුතු බැවිනි. 2006 වසරේදී ලකුණු සටහන් ක්‍රමය ද සංශෝධනය කෙරිණ. තවදුරටත් ‘PERFECT 10’ නම් සංකල්පයක් නැත. එනිසා නදියාට සමවීමට හෝ කිසිවකුට ඉඩක් නැත. ඈ සදාකාලිකව තනිව එම ගෞරවයට හිමිකම් කියනු ඇත.
රෂ්නිකා ලියනගේ