රට රැකියා ලබාදෙන බව පවසා මුදල් වංචාකළ කාන්තාවක් අත්අඩංගුවට
රුමේනියාවේ රැකියා ලබාදෙන බව පවසා මුදල් වංචාකළ කාන්තාවක් අත්අඩංගුවට ගෙන තිබෙනවා.
අදාළ කාන්තාව විසින් රාජගිරිය, මැද වැලිකඩ පාර ප්‍රදේශයේ සිය ආයතනය පවත්වාගෙන ගොස් ඇති බවයි වාර්තා වන්නේ.
ශ්‍රී ලංකා විදේශ සේවා නියුක්ති කාර්යාංශයේ විශේෂ විමර්ශන ඒකකයේ නිලධාරීන්ට ලද පැමිණිලි මත සිදුකළ සොදිසි මෙහෙයුමකදී එම සැකකාරිය අත්අඩංගුවට ගෙන තිබෙනවා.
එහිදී අදාළ ස්ථානයේ තිබී විදේශ ගමන් බලපත්‍ර 23ක් හා රුමේනියා රැකියා අයදුම්පත් රැසක් ද නිලධාරීන් විසින් සොයාගත් බව වාර්තා වනවා.
ඒ අනුව ශ්‍රී ලංකා විදේශ සේවා නියුක්ති කාර්යාංශ සඳහන් කලේ, සැකකාරිය රුමේනියාවේ රැකියා ලබාදෙන බව පවසා රුපියල් කෝටියකට අධික මුදලක් වංචා කර ඇති බවට තොරතුරු හෙළිවී ඇති බවයි.
අදාළ සැකකාර කාන්තාව විසින් මීන් පෙරද මෙවැනි ක්‍රියා හේතුවෙන් අධිකරණය මගින් ඇප නියම වී සිටි තැනැත්තියක් බව වැඩිදුර විමර්ශනවලදී අනාවරණය වී තිබෙනවා.
සැකකාරියව කොළඹ අංක 05 මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව ලක්ෂ 05ක මුදල් ඇපයක්, ලක්ෂ 10ක ශරීර ඇප දෙකක් හා දැඩි ඇප කොන්දේසි මත මුදා හැර ඇති අතර, විදෙස් ගමන් තහනමක්ද පනවා තිබෙනවා.