එන්නත් දෙකම ලබාගත් පුද්ගලයින්ට පැවැත්වීමට හැකි මංගල උත්සව
කුඩා හා මධ්‍ය පරිමාණ විවාහ සේවා සපයන්නන්ගේ සංගමය හා රජයේ වෛද්‍ය නිලධාරින්ගේ සංගමය අතර සාකච්ඡාවක් ඊයේ (29) රජයේ වෛද්‍ය නිලධාරින්ගේ සංගම් මූලස්ථානයේ දී පැවැත්වුණා.
අදාළ සාකච්ඡාව කුඩා හා මධ්‍ය පරිමාණ විවාහ සේවා සපයන්නන්ගේ සංගමය විසින් සිදුකළ ඉල්ලීමකට අනුව පැවැත්වුණු අතර ඔවුන් පවතින කොවිඩ් 19 වසංගත තත්වය හේතුවෙන් බරපතල අර්බුදයකට මුහුණ පා සිටිනවා.
මෙහිදී දෙපාර්ශ්වය අතර පවතින නීතිරීති සීමා යටතේ නැවතත් විවාහ මංගල උත්සව පැවැත්විය යුතු ආකාරය පිළිබඳව දීර්ඝව සාකච්ඡා වී තිබෙනවා.
ඒ අනුව පවතින කොවිඩ් සෞඛ්‍ය මාර්ගෝපදේශයන්ට යටත්ව ඉඩ ලබා දිය හැකි අවම අමුත්තන් සංඛ්‍යාවට සහභාගි වීමට අවස්ථාව ලබා දෙමින් විවාහ මංගල උත්සව ආරම්භ කිරීමට දෙපාර්ශවයෙන්ම එකඟතාව පල වූ බව රජයේ වෛද්‍ය නිලධාරීන්ගේ සංගමය නිවේදනයක් නිකුත් කරමින් සඳහන් කරනවා.
එමෙන්ම පවත්වනු ලබන විවාහ මංගල උත්සව මත්පැන් භාවිතයෙන් තොරව පැවැත්වීමටත් මෙම සාකච්ඡාවේදී එකඟ වී තිබෙනවා.
විවාහ මංගල උත්සව සඳහා සහභාගි විය හැක්කේ පූර්ණ එන්නත්කරණය සදහා භාජනය වු අයට පමණක් වන ලෙස සෞඛ්‍ය මාර්ගෝපදේශන සැකසීමටත් එහිදි වී එකඟතාව පළ වී ඇත.
කෙසේවෙතත් රජයේ වෛද්‍ය නිලධාරීන්ගේ සංගමය පවසන්නේ,වයස අවුරුදු 20 – 30 සීමාවේ සිටින තරුණ පරපුර එන්නත්කරණය සදහා දිරිමත් කිරීම මෙහි එක් අරමුනක් බවයි
රජයේ වෛද්‍ය නිලධාරින්ගේ සංගමය හා කුඩා හා මධ්‍ය පරිමාණ විවාහ සේවා සපයන්නන්ගේ සංගමය සමග එකඟ වූ මෙම ඉල්ලිම් ජනාධිපති කාර්යසාධක බලකායට ඉදිරිපත් කිරීමට නියමිතයි.